Փարիզում անոմալ տապի պատճառով էլեկտրաէներգիայի տեղային անջատում է տեղի ունեցել. AFP
Փարիզի կենտրոնում գտնվող Բորսայի հրապարակի շրջանը, որտեղ գործում է Ֆրանսպրես գործակալության կենտրոնակայանը, մնացել է առանց էլեկտրականության: Դրա մասին հայտնում է գործակալությունը՝ հղում անելով Enedis էներգացանցերի օպերատորին:
Ֆրանսպրես գործակալության տվյալներով՝ սկզբում առանց էլեկտրամատակարարման է մնացել 449 բաժանորդ, որոնցից 238-ի համար էներգիայի մատակարարումը դեռևս մնում է ընդհատված:
Օպերատոր ընկերությունից հայտնել են, որ խափանումը տեղի է ունեցել անոմալ տապի ֆոնին. բարձր ջերմաստիճանը, ներառյալ՝ գիշերային ժամերին, հանգեցրել է ասֆալտի գերտաքացման և հավելյալ ծանրաբեռնվածության ստորգետնյա էներգացանցի վրա, ինչն էլ առաջացրել է սարքավորումների տեղային վնասումներ:
Ֆրանսպրես գործակալության կենտրոնակայանը շարունակում է աշխատանքը պահուստային գեներատորների շնորհիվ, սակայն էլեկտրամատակարարման ամբողջական վերականգնման ժամկետները դեռևս չեն հստակեցվում:
Ֆրանսիայում հունիսի կեսերից պահպանվում է անոմալ շոգի ժամանակահատվածը, ինչն արդեն հանգեցրել է ուսումնական հաստատությունների աշխատանքի խափանումների, երկաթուղային երթևեկության սահմանափակումների և երկրի շրջանների մեծ մասում եղանակային վտանգի բարձր մակարդակի հայտարարման:
