Ավիաընկերություններն ու հյուրանոցները սկսել են վաճառել նախկինում անվճար բոնուսները
Ավիաընկերություններն ու հյուրանոցային ցանցերը ավելի ու ավելի հաճախ են սկսում վաճառել այն բոնուսները, որոնք ժամանակին անվճար էին առաջարկում։ Այս մասին հայտնում է «Investopedia»–ն։
Շատ դեպքերում ընկերությունները արժեզրկում են հաճախորդների «հավատարմության միավորները» (սկսում են նույն բոնուսների համար պահանջել ավելի շատ միավորներ, քան նախկինում) և սկսում են անվճար բոնուսներին զուգահեռ առաջարկել վճարովի բոնուսներ։
Հատկապես հատկանշական է նախորդ տարիների հետ համեմատությունը։ Օրինակ` 2009 թվականին ամերիկյան «Delta Airlines»-ը վաճառել է բիզնես դասի նստատեղերի միայն 12%-ը։ Մնացած 88%-ը նվերներ են եղել սովորական հաճախորդների համար, որոնց տեղափոխել են էկոնոմ դասից: Միևնույն ժամանակ 2026 թվականի առաջին եռամսյակում ընկերությունը բիզնես դասից վաստակել է ավելի քան 5 մլրդ դոլար։
«Էկոնոմ+» կամ «բիզնես» դասի տարբեր տեղերի համար այժմ գանձվում են տարբեր «հավատարմության միավորներ»: Ուղևորներին անակնկալ կերպով չեն տեղափոխում բիզնես դաս, այլ նրանց հնարավորություն է տրվում «գնել» հարմարավետ տեղեր իրենց հավաքած միավորներով: Իսկ մատչելի տեղերի քանակը նվազագույնի է հասցվել:
«Հավատարմության միավորները» իրենց արժեքը կորցնում են նաև հյուրանոցային ցանցերում: Լրատվամիջոցն օրինակ է բերում «Hyatt»-ը, որը նախկինում իր հավատարիմ հաճախորդներին «լյուքս» համարներ էր առաջարկում 45,000 միավորով, բայց այժմ գինը հասցրել է 75,000–ի:
Փորձագետները խորհուրդ են տալիս կուտակած բոնուսային միավորները պահել ոչ թե կոնկրետ ընկերություններում, այլ բանկային քարտերում (որոնցից մի քանիսը թույլ են տալիս միավորները փոխանցել մեկ հավատարմության ծրագրից մյուսը՝ ըստ հայեցողության):
