«Արարատ» թենիսի ակումբում քննչական գործողություններ են իրականացվում․ ՔԿ
Երևանի «Արարատ» թենիսի ակումբում քննչական գործողություններ են իրականացվում։ Sputnik Արմենիայի հետ զրույցում հայտնել են ՀՀ քննչական կոմիտեից։
«Երևան քաղաքի քննչական վարչությունում նախաձեռնված քրեական վարույթի շրջանակում կատարվում են քննչական և վարութային գործողություններ»,- հայտնել են ՔԿ-ից։
Նշենք, որ ավելի վաղ ԶԼՄ-ներում տեղեկություններ էին տարածվել, որ ակումբի դռները կապարակնքվել են, իրավապահները գործողություններ են իրականացնում։
Այլ մանրամասներ այս պահին հայտնի չեն։
Հիշեցնենք, որ 2024 թվականի սկզբին Երևանի քաղաքապետ Տիգրան Ավինյանը հայտարարեց, որ Օղակաձև այգու 4-րդ հատվածում գտնվող պատմական թենիսի կորտերն («Արարատ» թենիսի ակումբի կորտեր – խմբ.) այգու տրամաբանության մեջ չեն տեղավորվում։ Կորտերից բացի, այգու այդ մասում նաև սրճարաններ և ռեստորաններ կան, ու դրանք նույնպես նախատեսվում է քանդել, որպեսզի զբոսայգին, այսպես ասած, վերադարձվի երևանցուն։
«Արարատ» թենիսի ակումբն էլ հայտարարություն էր տարածել` նշելով, որ Երևանի ղեկավարությունը 2025 թվականին այդպես էլ չի գնացել տրամաբանական և հանրության ձայնը լսելու ճանապարհով, այլ նախորդ տարվա պես որոշել է քանդել Օղակաձև այգու 4-րդ գոտու ամենահին և իր բնույթով մարզաառողջապահական նշանակության օբյեկտը՝ պատճառաբանելով, թե դա գերակա հանրային պահանջ ունի:
