Վաղ առավոտից տոտալ հարձակում է ԲՀԿ տարածքային կառույցների, վստահված անձանց, շտաբերի, ենթաշտաբերի պատասխանատուների նկատմամբ. Իվետա Տոնոյան
Ժամը 08:00-ից սկսած «Բարգավաճ Հայաստան» կուսակցության նախընտրական շտաբը ստանում է բազմաթիվ ահազանգեր տարածքային կառույցների շտաբերի ներկայացուցիչներից այն մասին, որ օրը սկսվել է իրավապահ համակարգի ներկայացուցիչների, տարբեր օղակների հարձակումով, մասնավորապես՝ ԲՀԿ տարածքային կառույցների ներկայացուցիչների բերման ենթարկումներով, կալանավորումներով: Այս մասին ասել է ԲՀԿ խոսնակ Իվետա Տոնոյանը:
«Վաղ առավոտից սկսվել է տոտալ հարձակում ԲՀԿ տարածքային կառույցների, վստահված անձանց, շտաբերի, ենթաշտաբերի պատասխանատուների նկատմամբ:
Տարատեսակ շինծու և մտացածին մեղադրանքներով մեր համակիրները, մեր կուսակից ընկերները, մարզերում իրենց գործունեությունն իրականացնող շտաբերի պատասխանատուները մասսայաբար բերման են ենթարկվում»,-նշել է նա:
Տոնոյանը հավելել է, որ բոլորը, ովքեր ընտրատեղամասերում ականատես կլինեն ընտրական իրավունքի ոտնահարման դեպքերի, կարող են ահազանգել 010 600 601 հեռախոսահամարով։
