ԱՄՆ–ն պետք է պահպանի Ռուսաստանի հետ երկկողմ հարաբերությունները. Ռուբիո
ԱՄՆ-ն պետք է պահպանի երկկողմ հարաբերությունները Ռուսաստանի Դաշնության հետ՝ հաշվի առնելով ՌԴ միջուկային զինանոցը։ Ինչպես հաղորդում է ՌԻԱ Նովոստին, այս մասին հայտարարել է ԱՄՆ պետքարտուղար Մարկո Ռուբիոն։
«Առնվազն մենք պետք է հարաբերություններ և բանակցություններ ունենանք Ռուսաստանի հետ»,- ասել է ԱՄՆ պետքարտուղարը Ներկայացուցիչների պալատի հանձնաժողովում ընթացող լսումների ժամանակ։
Ռուբիոյի խոսքով՝ Ռուսաստանի հետ հարաբերությունները պետք է պահպանել՝ հաշվի առնելով նրա եթե ոչ ամենամեծ, ապա մեծությամբ երկրորդ միջուկային զինանոցն աշխարհում։
Ավելի վաղ ՌԴ նախագահի մամուլի քարտուղար Դմիտրի Պեսկովը հայտարարել էր, որ Ռուսաստանի և ԱՄՆ-ի միջև շփումները շարունակվում են՝ չնայած Ուկրաինայի հակամարտության կարգավորման գործընթացում առկա դադարին։
