ՄԱԿ-ի գլխավոր քարտուղարը ողջունել է Իսրայել-Լիբանան հրադադարը և կոչ արել պահպանել այն
ՄԱԿ-ի գլխավոր քարտուղար Անտոնիու Գուտերեշը ողջունել է Իսրայելի և Լիբանանի միջև հրադադարը և շնորհակալություն հայտնել ԱՄՆ-ին դրան նպաստելու համար։ Այս մասին նա գրել է X սոցիալական հարթակում։
«Հուսով եմ, որ սա ճանապարհ կհարթի հակամարտության երկարաժամկետ լուծման ուղղությամբ բանակցությունների համար և կնպաստի տարածաշրջանում երկարատև և համապարփակ խաղաղության հասնելու ուղղությամբ շարունակական ջանքերին», – հավելել է նա։
Գուտերեշը նաև կոչ է արել բոլոր կողմերին հարգել հրադադարը և «մշտապես պահպանել միջազգային իրավունքը»։
Իսրայելի և Լիբանանի մեջ 10-օրյա հրադադարն ուժի մեջ է մտել կեսգիշերին։ Հրադադարի մասին հայտարարել է ԱՄՆ նախագահ Դոնալդ Թրամփը։ Իսրայելը 1,5 ամիս հարվածներ էր հասցնում Լիբանանին՝ Իրանին աջակցող «Հեզբոլլահ» շարժման դեմ պայքարի շրջանակում։ Իսրայելական հարվածներից Լիբանանում շուրջ 2200 մարդ է զոհվել։
Իսրայելը ցամաքային գործողություններ է սկսել Լիբանանի հարավում։ Ըստ The Associated Press-ի՝ Իսրայելի վարչապետ Բենիամին Նեթանյահուն հայտարարել է, որ հրադադարի ընթացքում օկուպացումը կշարունակվի։ «Հեզբոլլահ»-ն իր հերթին հայտարարել է, որ իսրայելական օկուպացման շարունակումը Լիբանանին դիմակայելու իրավունք է տալիս։
