Անհայտ զինված անձինք կրակ են բացել Աֆղանստանի այգում հանգստացողների վրա

Աֆղանստանի Հերաթ նահանգում անհայտ զինված անձինք մոտոցիկլետներով կրակ են բացել Ինջիլ շրջանի այգում հանգստացողների վրա՝ սպանելով յոթ մարդու։ Այս մասին հաղորդում է Ariana News-ը՝ հղում անելով Աֆղանստանի Ներքին գործերի նախարարության խոսնակ Աբդուլ Մատին Կանիին։

Դեպքը տեղի է ունեցել Գաբարզուն գյուղում։ Ականատեսների խոսքով՝ հարձակվողները նախ տղամարդկանց բաժանել են ամբոխից և սպանել նրանց կանանց և երեխաների աչքի առաջ։ Փախուստի փորձ կատարած կանայք նույնպես զոհվել են։ Ըստ տեղեկությունների՝ զոհերի թվում կան երեխաներ։

Ըստ տեղեկությունների՝ զոհվածներն ու վիրավորները ուխտագնացության էին մեկնել Սեյեդ Մոհամմադ Աղայի շիական սրբավայր և ժամանակ էին անցկացնում տեղի այգում։ Հարձակման համար դեռևս ոչ մի խմբավորում պատասխանատվություն չի ստանձնել։