Էլ ինչ կարող են անել այս իշխանությունները՝ ապացուցելու, որ գործում են հայկական շահերին դեմ. ՀՅԴ
Վերջին օրերի երեք զարգացումները հերթական անգամ ցույց են տալիս, թե որքան հեռացել է Հայաստանի ներկայիս իշխանությունը հայկական ազգային շահերից և ինքնությունից։
Հայաստանի վարչապետը Եվրոպական խորհրդարանում հրապարակավ խոսեց Հայ Առաքելական Եկեղեցու դեմ։ Այսպիսի հայտարարությունները ոչ միայն վարկաբեկում են մեր հազարամյա եկեղեցին, այլ նաև խարխլում են Հայաստանի ազգային հեղինակությունը միջազգային հարթակներում։
Միևնույն ժամանակ, իշխանությունը պահանջեց հրաժարական Հայոց ցեղասպանության թանգարան-ինստիտուտի ղեկավարից՝ պատճառաբանելով, որ ԱՄՆ փոխնախագահ Ջեյ Դի Վենսին Արցախի մասին գիրք նվիրելը «սադրիչ» քայլ է։ Բացի հայկական շահերին դեմ լինելուց, այս արարքը նաև լուրջ հարցեր է բարձրացնում մեր երկրի ժողովրդավարական ինստիտուտների վերաբերյալ, երբ վարչապետի պաշտոնը զբաղեցնողը կարող է պահանջել ակադեմիական հաստատության ղեկավարի հրաժարականը։
Բացի այդ, բացահայտվեց, որ իշխանության թիմի պատգամավոր Մարիա Կարապետյանը մասնակցել է համակարգված արշավի՝ ուղղված Ամերիկայի Հայ դատի հանձնախմբի (ANCA) դեմ՝ կազմակերպության, որը տարիներ շարունակ պաշտպանել է հայկական շահերը ԱՄՆ Կոնգրեսում։
Էլ ինչ կարող են անել այս իշխանությունները, ապացուցելու համար, որ գործում են հայկական շահերին դեմ:
ՀՅԴ
