Բեզոսը մի քանի հողամաս է գնել «միլիարդատերերի բունկերում»
Amazon ընկերության հիմնադիր Ջեֆ Բեզոսը Ֆլորիդայի «միլիարդատերերի բունկեր» անունով հայտնի կղզում ունի մի քանի անշարժ գույք, որոնց ընդհանուր արժեքը կազմում է 339 միլիոն դոլար, և դրանցից երեքը գտնվում են Մարկ Ցուկերբերգի սեփականության մոտակայքում, պարզել է РИА Новости-ն հանրային գրառումները ուսումնասիրելուց հետո։
Մարտին հաղորդվել էր, որ Ցուկերբերգը և նրա կինը 170 միլիոն դոլար արժողությամբ առանձնատուն են գնել Բիսկեյն ծոցի մասնավոր կղզում՝ Ինդիան Քրիքում, որը հաճախ անվանում են «միլիարդատերերի բունկեր»՝ իր մեկուսացվածության և անվտանգության աննախադեպ միջոցառումների պատճառով: Կղզին գտնվում է Մայամի Բիչից դեպի հյուսիս:
Սեփականության գրառումները և այլ հրապարակային տվյալներ ուսումնասիրելուց հետո, РИА Новости-ն պարզել է, որ Բեզոսն այժմ ունի չորս հողամաս Ինդիան Քրիքում, որոնք նա ձեռք է բերել 2023 թվականի կեսերից մինչև 2025 թվականի հունիսը։ Այս հողամասերից երեքը, որոնց ընդհանուր մակերեսը կազմում է մոտ 26,000 քառակուսի մետր, գտնվում են Ցուկերբերգի նոր սեփականության (հողամաս 7) մոտակայքում։
