«Կառավարությունը ես եմ, եթե կա մեկը, ով իմ դիրքորոշմանը հակասող դիրքորոշում ունի՝ դիմումը գրի». Նիկոլ Փաշինյան
Այսօր Կառավարության հերթական նիստից հետո Նիկոլ Փաշինյանը կրկին ճեպազրույց ունեցավ, բայց նախապայման առաջ քաշեց, որ լրագրողների հետ ճեպազրույցը պետք է լինի ուղիղ մեկ ժամ։
Լրագրողների հարցերից մեկը վերաբերում էր ՀԷՑ-ի հետ կապված միջազգային արբիտրաժային դատարանի կայացրած որոշմանը, որն ընդունել է նաև Կառավարությունը, ի վերջո, դատարանի որոշումը Կառավարությունը կատարելո՞ւ է։
Նիկոլ Փաշինյանը զարմացած հարցրեց լրագրողին, թե ո՞վ է ասում, որ Կառավարությունը դատարանի որոշումն ընդունել է։
«Կառավարությունից ով դիրքորոշում հայտնել է, թող դիմում գրի գնա, բացարձակապես նման դիրքորոշում չի կարող լինել։ Կառավարությունը ես եմ, որևէ մեկը չի կարող իմ դիրքորոշմանը հակասող դիրքորոշում ունենալ, ընդհանրապես, եթե Կառավարությունում մարդիկ կան, որոնք իմ դիրքորոշմանը հակասող դիրքորոշում ունեն, հենց հիմա թող դիմում գրեն ու շենքերից դուրս գան, եթե՝ ոչ, ապա ես ինքս նրանց կհանեմ»,- սպառնաց Նիկոլ Փաշինյանը։
Լրագրողի ճշտող հարցին՝ Կառավարությունը կատարելո՞ւ է արբիտրաժային դատարանի որոշումը, Նիկոլ Փաշինյանը պատասխանեց.
«Արբիտրաժային դատարանում մենք հաղթել ենք և մեր դիրքորոշումը պնդել ենք, այդքան բան»։
Ինչ վերաբերում է ԱՄՆ նախագահ Թրամփի հայտարարությանը՝ Սյունիքով Ադրբեջանի հետ ճանապարհի վերահսկողությունն 99 տարով վերցնելու մասին, Նիկոլ Փաշինյանն ասաց՝ արդեն ասել է, որ որևէ պայմանավորվածություն չկա։
«Կողմերը կարող են ունենալ իրենց դիրքորոշումներն ու մոտեցումները, բայց ուզում եմ ընդգծել, որ Հայաստանում կան բազմաթիվ ներդրումային ծրագրեր, որոնք, օրինակ, ունեն կառուցապատման իրավունք՝ 40-50 տարով։ Հասկանո՞ւմ եք, երբ որևէ տեղ ներդրում է արվում, մարդիկ պետք է ունենան բավարար վստահություն, որ այդ ներդրումներն իրենք կարող են հետ բերել։ Ցանկացած ներդրման դեպքում մարդը պետք է ունենա վստահությունը, որ 1 տարի հետո իրեն չեն ասելու, որ այլևս այդ ներդրումները չեն աշխատում։ Այսօր ցանկացած բիզնես, օտարերկրյա ներդրում ՀՀ-ում ունի որոշակի երաշխիքների համակարգ, որ այդ ներդրումը պետք է աշխատի»,- ընդգծեց Նիկոլ Փաշինյանը։
Մանրամասները՝ 168.am-ի տեսանյութում
