Թուրքիան խոշոր վարկ է ստացել «Զանգեզուրի միջանցքին» միանալու համար
ԱՄՆ նախագահ Դոնալդ Թրամփի վարչակազմի՝ այսպես կոչված «Զանգեզուրի միջանցքի» հետ կապված բարձր մակարդակի ծրագրի քննարկումների ֆոնին հայտնի է դարձել, որ Թուրքիայի կառավարությունը միջազգային ֆինանսական հաստատություններից բազմամիլիարդ դոլարի վարկ է ստացել՝ այս երթուղուն միանալու համար։
Այս մասին գրում է «Անադոլու» գործակալությունը: Ավելի վաղ աղբյուրը հայտնել էր, որ Թուրքիայի ֆինանսների նախարարության և գանձապետարանի, ինչպես նաև ճապոնական MUFG Bank բանկի գլխավորած վարկատուների խմբի միջև ստորագրված համաձայնագրի համաձայն՝ Անկարային հատկացվել է 2.4 միլիարդ եվրո՝ դեպի Նախիջևան տանող երկաթուղային գծի կառուցման համար։
Վարկը կտրամադրվի Շվեդիայի արտահանման վարկային գործակալության՝ EKN-ի, Ավստրիայի OeKB բանկի և Իսլամական զարգացման բանկի ներքո գտնվող ներդրումների և արտահանման վարկերի ապահովագրության իսլամական կորպորացիայի երաշխիքներով։
Վարկի ստացման շուրջ բանակցությունները տեղի են ունեցել Թուրքիայի ֆինանսների և գանձապետարանի նախարար Մեհմեթ Շիմշեքի՝ Լոնդոնում Իսլամական զարգացման բանկի կողմից կազմակերպված վարկատուների գագաթնաժողովին մասնակցության շրջանակներում: Ձեռք բերված համաձայնության համաձայն՝ միջազգային վարկատուները կֆինանսավորեն Կարս-Իգդիր-Արալըք-Դիլուջու երկաթուղու կառուցման նախագիծը:
Նախագծի իրականացումը կկառավարի Թուրքիայի տրանսպորտի և ենթակառուցվածքների նախարարությունը:
