Օրինջ Քաունթիում թալանել են հայկական եկեղեցու գանձապահարանը
ԱՄՆ-ի Կալիֆորնիա նահանգի Օրինջ Քաունթի բնակավայրում անհայտ անձինք, ամենայն հավանականությամբ` ոչ հայեր, թալանել են տեղի հայկական եկեղեցու գանձապահարանը` իրենց հետ տանելով շուրջ 15.000 դոլար:
Թեև եկեղեցու տեսախցիկը արձանագրել է երեք կողոպտիչների դեմքերը, սակայն ոստիկանությանը դեռևս չի հաջողվել գտնել նրանց, «Ազատություն» ռադիոկայանին փոխանցեցին Սուրբ Քառասնից Մանկանց եկեղեցուց:
Ընդունված ավանդույթի համաձայն, ամեն շաբաթ եկեղեցու կից սրահում հիմնականում հայերը հավաքվում են «բինգո» խաղալու, որի շահույթը հանձնվում է եկեղեցուն` իբրեւ բարեգործություն: Կողոպտիչները բացել են հենց այն գանձապահարանը, որտեղ դրված էր վերջին խաղից ստացված շահույթը:
Տեղի ոստիկանությունը հնարավոր է համարում այդ երեք անձանց առնչությունը նաեւ այլ գողությունների:
Ի դեպ, ավելի վաղ նույն ձեռագրով գողություն էր կատարվել նաև Գլենդեյլի հայկական եկեղեցուց:
