Բաժիններ՝

Գերմանիայում բունդեթագի արտահերթ ընտրություններ են անցկացվում

Կիրակի օրը Գերմանիայի դաշնային բոլոր հողերում մեկնարկում են Բունդեսթագի (Գերմանիայի խորհրդարանի) ընտրությունները։

Ընտրատեղամասերը կբացվեն տեղական ժամանակով 08:00-ին։ Գերմանիայի քաղաքացիները կքվեարկեն ինչպես կոնկրետ թեկնածուների, այնպես էլ կուսակցությունների օգտին, որոնք պայքարում են Բունդեսթագում տեղերի համար։

Քվեարկությունը կտևի մինչև 18:00-ն, որից անմիջապես հետո կհայտարարվեն էքզիթ փոլերի արդյունքները։ Գերմանացիները կքվեարկեն նաև փոստով․ 2021 թվականի նախորդ ընտրություններում այդ հնարավորությունից օգտվել էր քաղաքացիների գրեթե 47,3%-ը։ Այն ժամանակ այդ ցուցանիշը ռեկորդային էր։

Գերմանիայի Դաշնային ընտրական հանձնաժողովի կողմից պաշտոնապես ճանաչված 41 կուսակցություններից ընտրություններին կմասնակցի 29-ը։ Բունդեսթագի կայքում նշվում է, որ Սոցիալ-դեմոկրատական կուսակցությունը (ԳՍԴԿ), «Կանաչները», Ազատ դեմոկրատական կուսակցությունը, «Այլընտրանք Գերմանիայի համար» (ԱԳհ), «Ձախերը», «Ազատ ընտրողները», «Վոլտը», Մարքսիստ-լենինյան կուսակցությունը, «Գերմանիայի դաշինքը» և «Սառա Վագենկնեխթի միությունը» թեկնածուներ են առաջադրել բոլոր 16 դաշնային հողերում։

Քրիստոնյա-դեմոկրատական միությունը (ՔԴՄ) Բավարիայից բացի մասնակցում է բոլոր հողերում, իսկ Քրիստոնյա-սոցիալական միությունը (ՔՍՄ)՝ միայն Բավարիայում։

Գերմանիայի կանցլերը կընտրվի Բունդեսթագում՝ կոալիցիոն բանակցություններից հետո։ Կանցլերի պաշտոնի հիմնական թեկնածուներ են համարվում Ֆրիդրիխ Մերցը (ՔԴՄ/ՔՍՄ), Օլաֆ Շոլցը (ԳՍԴԿ), Ռոբերտ Հաբեկը («Կանաչներ») և Ալիս Վայդելը (ԱԳհ)։

Ըստ Politbarometer ընկերության վերջին հարցման, ՔԴՄ/ՔՍՄ դաշինքը շարունակում է առաջատար լինել՝ 28% աջակցությամբ։
Երկրորդ տեղում է ԱԳհ-ն՝ 21%-ով, իսկ երրորդ տեղում՝ ԳՍԴԿ-ն 16%-ով։ «Կանաչներ» կուսակցության համար պատրաստ է քվեարկել ընտրողների 14%-ը, «Ձախերի» համար՝ 8%-ը, Ազատ դեմոկրատական կուսակցության (ԱԴԿ) համար՝ 4,5%-ը, «Սառա Վագենկնեխթի միության» համար՝ 4,5%-ը, մնացած կուսակցությունների համար՝ 4%-ը։

Ինչ վերաբերում է կանցլերի թեկնածուներին, ապա հարցվածների 32%-ը ցանկանում է այդ պաշտոնում տեսնել Ֆրիդրիխ Մերցին (ՔԴՄ/ՔՍՄ), 21%-ը՝ Ռոբերտ Հաբեկին («Կանաչներ»), 18%-ը՝ Օլաֆ Շոլցին (ԳՍԴԿ), 14%-ը՝ Ալիս Վայդելին (ԱԳհ), իսկ 15%-ը դեռևս չի կողմնորոշվել։

Բաժիններ՝

Տեսանյութեր

Լրահոս