ՆԱՏՕ-ն հայտարարել է սաբոտաժի ակտերի մասին, ներառյալ Rheinmetall ընկերության ղեկավարի սպանության նախապատրաստումը
ՆԱՏՕ-ն երեքշաբթի օրը հայտարարել է, որ վերջին տարիներին ռազմական դաշինքի ողջ տարածքում իրականացված սաբոտաժի ակտերը ներառել են արդյունաբերության առաջնորդների, այդ թվում՝ զենք արտադրող գերմանական Rheinmetall-ի ղեկավարի սպանության սպառնալիքներ։ Այս մասին հաղորդում է Reuters-ը:
Եվրոպական խորհրդարանում ելույթի ժամանակ ՆԱՏՕ-ի գլխավոր քարտուղարի՝ նորարարությունների, հիբրիդային տեխնոլոգիաների և կիբեռտարածության գծով օգնականի տեղակալ Ջեյմս Ապպատուրայը հաստատել է Rheinmetall-ի գլխավոր տնօրեն Արմին Պապպերգերի հասցեին հնչեցված սպառնալիքը, որի մասին մինչ այժմ միայն լրատվամիջոցներն էին հաղորդել:
Նա պատմել է, որ սաբոտաժի արշավը ներառել է «գնացքների դուրս գալը ռելսերից, հրկիզումներ, քաղաքական գործիչների սեփականության վրա հարձակումներ, արդյունաբերության առաջնորդների, ինչպիսին է Rheinmetall-ի ղեկավարը, սպանության դավադրության սպառնալիքներ, սակայն եղել են նաև այլ դավադրություններ»:
Հուլիսին CNN հեռուստաալիքը հաղորդել էր, որ Պապպերգերի սպանության դավադրությունը ռուսական կառավարության կողմից ամբողջ Եվրոպայում Ուկրաինայի ռազմական գործողություններին աջակցող պաշտպանական արդյունաբերության ղեկավարներին ոչնչացնելու պլանների շարքից մեկն էր: Կրեմլը մերժել է այս մեղադրանքը:
Ապպատուրայը հայտարարել է, որ անցյալում Արևմուտքին հաջողվել է կանխել Ռուսաստանի կողմից սաբոտաժի գործողությունների իրականացումը՝ ամենաբարձր մակարդակով «կարմիր գծեր» սահմանելով, ինչպես դա եղել է, երբ գերմանական պահեստում հայտնաբերվել էին DHL չվերթների համար նախատեսված հրկիզող սարքեր:
«Նրանց հնարավոր է կանգնեցնել, եթե դուք սահմանեք, թե որոնք են ձեր «կարմիր գծերը» միմյանց միջև, այնուհետև արդյունավետ հաղորդեք դրա մասին, և պարտադիր չէ, որ դա լինի հրապարակային»,- ասել է նա:
ՆԱՏՕ-ի ներկայացուցիչը նշել է նաև, որ Արևմուտքը որպես նորմա չի ընդունի սաբոտաժների ներկայիս մակարդակը, որը ՆԱՏՕ-ն անվանում է ռեկորդային բարձր, և որ դաշնակիցները հստակ գիտակցում են, «որ մենք պետք է ավելի վճռական լինենք» Բալթիկ ծովում կրկնվող միջադեպերի դեմ պայքարում:
Ապպատուրայն առաջարկել է ՆԱՏՕ-ին դառնալ ավելի հաստատակամ և պարտադիր չէ սպասել ոստիկանական հետաքննության ավարտին, որը կարող է տևել վեց կամ յոթ ամիս, նախքան որևէ գործողություն ձեռնարկելը:
«Մեր կարծիքով, պատճառների որոշումը կարևոր է, սակայն դա չի կարող խոչընդոտ լինել գործողությունների համար»,- ընդգծել է նա՝ ավելացնելով, որ ՆԱՏՕ-ն պետք է գործի, եթե ստորջրյա ենթակառուցվածքին շարունակում է վնաս հասցվել այն պատճառով, որ «ստվերային նավատորմի նավերը իրենց խարիսխները քարշ են տալիս օվկիանոսով 100 կմ երկայնքով»:
«10 տրիլիոն դոլարի տնտեսական ակտիվությունն իրականացվում է ստորջրյա մալուխների միջոցով, որից 4 տրիլիոնն անցնում է Ատլանտյան օվկիանոսով։ Եթե դա ընդհատվի, դա լուրջ տնտեսական վնաս կհասցնի»,- ասել է Ապպատուրայը: ՆԱՏՕ-ն մտադիր է համաձայնեցնել հիբրիդային սպառնալիքներին հակազդելու ռազմավարությունը մինչև հունիսի վերջին Հաագայում կայանալիք դաշինքի գագաթնաժողովը:
