Թաթա Սիմոնյանը և Քրիստինա Օրբակայտեն այսօր հանրության դատին կներկայացնեն «Մեր սիրո տոնը» զուգերգը (տեսանյութ)
Հայ երգիչ Թաթա Սիմոնյանը և ռուսական էստրադայի հանրահայտ երգչուհի Քրիստինա Օրբակայտեն ապրիլի 7-ին հանրության դատին կներկայացնեն «Մեր սիրո տոնը» երգը: «Արմենպրես»-ի թղթակցի հետ զրույցում Սիմոնյանի պրոդյուսեր Գրիգոր Նազարյանը նշել է, որ տեսահոլովակը արտիստների կողմից իրենց երկրպագուներին նվեր է մայրության և գեղեցկության տոնի` ապրիլի 7-ի կապակցությամբ:
«Երգի գաղափարը առաջացավ համատեղ միջոցառման մասնակցությունից հետո: Հետագայում մենք առաջարկեցինք նկարահանել նաև երգի տեսահոլովակը»,- ասել է Նազարյանը: Նրա խոսքով` երգի տեսահոլավակի պրեմիերան YouTube-ում նախանշված է ապրիլի 7-ին: «Մեր սիրո տոնը» երգի խոսքերի հեղինակը Ավետ Բարսեղյանն է, երաժշտությունը գրել է Մանե Հակոբյանը: Տեսահոլովակի նկարահանումները տեղի են ունեցել Լոս Անջելեսում 2013 թվականի սկզբին:
Հանդիսանալով փոփ-ֆոլկլյոր ժանրի վառ ներկայացուցիչ` Թաթան իր երաժշտական գործունեությամբ հայկական երգարվեստում համարվում է եզակի հեղինակ-կատարող: Նա իր խմբի անդամների հետ ավելի քան 20 տարի ներկայացնում է հայկական երաժշտությունը: 2006 թ-ին արժանացել է ՀՀ վաստակավոր արտիստի կոչման: 2008թ-ին Մոսկվայի «Տաշիր» ամենամյա հայկական երաժշտական մրցանակաբաշխությանն արժանացել է «Հայ փոփ երաժշտության արքա» տիտղոսին:
Համերգային գործունեության 20 տարիների ընթացքում Թաթան բազմաթիվ համերգներով հանդես է եկել ԱՄՆ-ում, Կանադայում, Ավստրալիայում, Հոլանդիայում, Բելգիայում, Անգլիայում, Ֆրանսիայում, Իսպանիայում, Հունաստանում, Կիպրոսում, նաև` Մերձավոր Արևելքի շատ երկրներում, Ռուսաստանի 45 քաղաքներում՝ հեղինակավոր համերգային դահլիճներում հավաքելով ռեկորդային թվով հանդիսատես:
Թաթան իր բոլոր երգերի և′ երաժշտության, և′ խոսքերի հեղինակն է: Նրա երգերի մեծամասնությունը հիթեր են դարձել և միշտ առաջատար հորիզոնականներ զբաղեցրել հեռուստա և ռադիոեթերներում, հաղթող են ճանաչվել բազմաթիվ երաժշտական անվանակարգերում: Նա ձայնագրել է զուգերգեր մի շարք հայտնի երգիչների հետ Ռուսաստանից և ԱՊՀ երկրներից, այդ թվում` Լյուբով Ուսպենսկայայի, Անատոլի Դնեպրովի: Մասնակցել է «Երևան-Մոսկվա տրանզիտ» նախագծին, որտեղ զուգերգերով հանդես է եկել «Օտպետիե Մաշեննիկի» և «Ռեֆլեքս» ռուսական խմբերի հետ: «Հայաստանի ձայնը» նախագծում երգիչը հանդես ակավ որպես մարզիչ:
Քրիստինա Օրբակայտեն ռուսական էստրադայի, կինոյի և թատրոնի վառ ներկայացուցիչներից է: Օրբակայտեն կատարել է ավելի քան 150 երգ, նկարահանվել ավելի քան երկու տասնյակ գեղարվեստական և հեռուստատեսային ֆիլմերում: Ռուսական էստրադայի պրիմադոննա Ալլա Պուգաչովայի դուստրը համեգներով հանդես է եկել աշխարհի տարբեր երկրներում` Գերմանիայում, ԱՄՆ-ում, Ֆրանսիայում, այդ թվում նաև` Հայաստանում:
Այժմ Youtube-ում տեղադրված է տեսահոլովակի կարճ տարբերակը:
