Ֆրանսիայում սկսվել է արտահերթ խորհրդարանական ընտրությունների քվեարկությունը
Ֆրանսիայում բացվել են ընտրատեղամասերը՝ Ֆրանսիայի խորհրդարանի ստորին պալատի՝ Ազգային ժողովի արտահերթ ընտրությունների առաջին փուլի համար, հայտնում է FRANCE 24-ը։
Երկրի եվրոպական տարածքում քվեարկությունը կտեւի առավոտյան ժամը 8-ից մինչեւ 18-ը։ Խոշոր քաղաքներում ընտրատեղամասերը կարող են բաց լինել մինչև 20 ժամ՝ կախված ընտրողների հոսքից։
Երկու փուլով՝ հունիսի 30-ին եւ հուլիսի 7-ին, ֆրանսիացիները պետք է ընտրեն 577 պատգամավորի, ովքեր իրենց շահերը կներկայացնեն երկրի խորհրդարանում։ Երկրի պատմության մեջ առաջին անգամ ընտրություններ են անցկացվում այսքան կարճ ժամանակում։
Հիշեցնենք, որ նախագահ Էմանուել Մակրոնը հունիսի 9-ի երեկոյան հայտարարեց խորհրդարանը ցրելու մասին, կուսակցությունները երեք շաբաթից էլ քիչ ժամանակ ունեցան իրենց թեկնածուներին առաջադրելու և նախընտրական քարոզարշավ իրականացնելու համար։
