Anonymous-ը կիբերհարձակումներ է իրականացնում Վրաստանի պետական կառույցների կայքերի վրա՝ հաջակցություն ցուցարարների
Միջազգային Anonymous հաքերային խումբը ստանձնել է Վրաստանի արդարադատության նախարարության կայքի վրա հարձակման պատասխանատվությունը, որը տեղի է ունեցել ուրբաթ՝ մայիսի 3-ի երեկոյան։ Այս մասին գրում է dw.com-ը:
«Anonymous-ն անջատել է Վրաստանի արդարադատության նախարարության կայքը»,- ասվում է X սոցիալական ցանցում Anonymous-ի տարածած հայտարարության մեջ:
Ինչպես պարզաբանում է «Էխո Կավկազա»-ն, Արդարադատության նախարարության ղեկավար Ռատի Բրեգաձեն միայն մայիսի 4-ի կեսգիշերից հետո է հայտարարել, որ կայքի աշխատանքը վերականգնվել է, և իր դժգոհությունն է հայտնել կիբերհարձակումներով ուրախացողների նկատմամբ։
«Պետական գործակալության վեբկայքն անջատելը հանցագործություն է և ուրախությամբ ու հպարտությամբ կիսվելը առնվազն կատարյալ անբարոյականություն է:Արդարադատության նախարարության կայքից օգտվում են բազմաթիվ մարդիկ՝ անկախ քաղաքական հայացքներից։ Ըստ այդմ՝ տուժում են մարդիկ, որոնք կարող են բախվել տարբեր արտակարգ իրավիճակների»,- գրել է նա Facebook-ում։
Anonymous-ը մի քանի օր շարունակ հարձակումներ է իրականացնում վրացական կառավարական կայքերի վրա, նշում է «Էխո Կավկազա»-ն։ Նախկինում հաքերներին հաջողվել էր անջատել իշխող «Վրացական երազանք» կուսակցության, կառավարամետ PosTV հեռուստաալիքի և Վրաստանի ՆԳՆ կայքերը։
Միջազգային հաքերային խումբը խոստանում է շարունակել փակել կառավարական վեբ ռեսուրսները «սեփական քաղաքացիների նկատմամբ անմարդկային գործողությունների համար»՝ նկատի ունենալով վրացական ոստիկանության արձագանքը Թբիլիսիում ցուցարարների հետ բախումներում՝ ընդդեմ «Օտարերկրյա ազդեցության թափանցիկության մասին» օրենքի:
