Լարված իրավիճակ և բախումներ
Վաղ առավոտից ժողովուրդը փակել է Տավուշի մարզի Վրաստան, Բագրատաշեն տանող ճանապարհը: Լարված իրավիճակ է, ժողովրդի հետ այնտեղ են քաղաքական, հասարակական որոշ գործիչներ: Տեղում են նաև տասնյակ ոստիկաններ:
Տեղեկացնենք նաև, որ Կիրանցում բնակիչներն ԱԱԾ աշխատակիցներին թույլ չեն տվել ականազերծում իրականացնել զորքերի հետքաշման համար։ Բնակիչները ճանապարհը փակել են` պահանջելով չեղարկել Ադրբեջանի հետ սահմանազատման ու սահմանագծման վերաբերյալ Նիկոլ Փաշինյանի ձեռքբերած դավաճանական պայմանավորվածությունը։
Քիչ առաջ Մարտական եղբայրություն միաբանության ֆեյսբուքյան էջը տեղեկացրել է, որ միության անդամները ևս Տավուշում են:
Իրավիճակի սրվելու պատճառ է հանդիսացել նաև այն, որ Երկրապահ կամավորականների միության տարբերանշանով մեքենայի վարորդը վարել է ճանապարհը փակած ժողովրդի վրա:
Մարտական եղբայրություն միաբանության ֆեյսբուքյան էջը տեսանյութ է հրապարակել և գրել.
«Բագրատաշեն տանող ճանապարհին բախումներ սկսվեցին այն բանից հետո, երբ երկրապահներից ոմն Յուրա, մեքենան վարել է ճանապարհը փակած ժողովրդի վրա»:
Տավուշում ստեղծված իրավիճակի պատճառով ժամանակավորապես փոխվել է Երևան-Թբիլիսի երթուղին, այդ մասին ArmeniaSputnik-ին հայտնել էր ուղևորափոխադրող տրանսպորտային ընկերություններից մեկի ներկայացուցիչը։
Մեքենաները սովորաբար շարժվում են Երևանից Աբովյան-Սևան-Դիլիջան-Իջևան-Նոյեմբերյան երթուղով, այնուհետև դուրս են գալիս դեպի Վրաստանի սահման՝ Բագրատաշեն գյուղի մոտ:
Սակայն այժմ ընկերությունը փոխել է ճանապարհը և ուղևորներին Վրաստան է տեղափոխում երկու այլընտրանքային ճանապարհներով՝ Վանաձորով և Ալավերդիով։
Սահմանազատումից հետո, հնարավոր է, ընկերությունում ընդհանրապես հրաժարվեն Իջևանով և Նոյեմբերյանով անցնող ճանապարհից։
