Շոլցն ասել է, որ մտադիր չէ ժամկետից շուտ թողնել իր պաշտոնը
Գերմանիայի կանցլեր Օլաֆ Շոլցն ասել է, որ մտադիր չէ վաղաժամկետ թողնել իր պաշտոնը կամ խորհրդարանին ներկայացնել իր կառավարության վստահության քվեի հարցը։ Այդ մասին տեղեկացնում է «ՌԻԱ Նովոստի»-ն։
Նախկինում մի շարք լրատվամիջոցներ հայտնում էին, որ Շոլցը կարող է լքել կանցլերի պաշտոնը 2024 թվականի սկզբին, իսկ պաշտպանության նախարար Բորիս Պիստորիուսը համարվում էր նրա ամենահավանական իրավահաջորդը։
Շոլցն իրեն փոխելու կամ կառավարության վստահության քվեին առնչվող հարցերը հեքիաթներ է անվանել։ Հարցին, թե մտածում է արդյոք ամեն ինչից հրաժարվելու մասին, կանցլերը տվել է բացասական պատասխան։
Նախորդ տարվա դեկտեմբերին Գերմանիայի ամենամեծ ընդդիմադիր Քրիստոնեա-դեմոկրատական միության ղեկավար Ֆրիդրիխ Մերցը Գերմանիայի կանցլեր Օլաֆ Շոլցին կոչ արեց միգրացիոն հարցերի շուրջ դաշնային նահանգների հետ ձեռք բերված համաձայնությունները վերածել օրինագծերի և դրանց ընդունումը խորհրդարանում կապել անձամբ Շոլցի վստահության քվեի հետ։ Այլ ընդդիմադիր ուժերից աջակողմյան «Այլընտրանք Գերմանիայի համար» կուսակցությունը նույնպես հանդես եկավ իշխանափոխության և արտահերթ ընտրությունների կոչով։
Հունվարի սկզբին հեղինակավոր «Բիլդ» պարբերականը հրապարակեց տեղի ազդեցիկ ինստիտուտներից մեկի սոցիոլոգիական հարցման արդյունքները, որոնց համաձայն՝ հարցվածների 64,3%-ը կողմ էր, որպեսզի Պիստորիուսը փոխարինի Շոլցին։
