«Հայաստան Արցախ հիմնադրամը» վերջին 34 տարում նվիրաբերել է 1 միլիարդ դոլարի օգնություն Հայրենիքին
«Հայաստան Արցախ հիմնադրամը» հասել է աննախադեպ նվաճման՝ վերջին 34 տարում Հայաստան և Արցախ առաքելով ավելի քան մեկ միլիարդ դոլարի մարդասիրական օգնություն:
Ներկայումս հիմնադրամը պայմանավորվածություններ է ձեռք բերել շտապ օգնություն ուղարկելու ուղղությամբ, որը հատուկ ուղղված կլինի Հայաստանում գտնվող ավելի քան 100,000 փախստականներին, որոնք բռնի տեղահանվել են Արցախից:
Միայն 2023 թվականի առաջին ինն ամիսներին հիմնադրամը Հայաստան և Արցախ է առաքել 34 միլիոն դոլարի դեղորայք (30 միլիոն դոլար՝ Հայաստան և 4 միլիոն դոլար՝ Արցախ):
Հիմնադրամի բոլոր բժշկական առաքումները պետք է նախապես ստանան Հայաստանի Առողջապահության նախարարության հավանությունը, որն ընտրում է այն դեղերը, որոնք ցանկանում է ստանալ՝ նշելով քանակն ու պիտանիության ժամկետները և տրամադրում է ներմուծման լիցենզիա։
1989 թվականից ի վեր, իր նախորդի՝ Միացյալ հայկական հիմնադրամի հետ միասին, հիմնադրամը Հայաստան և Արցախ է առաքել ավելի քան մեկ միլիարդ դոլարի մարդասիրական օգնություն, հիմնականում դեղորայք, 158 բեռնատար ինքնաթիռներով և 2566 ծովային բեռնարկղերով:
««Հայաստան Արցախ հիմնադրամին» անվճար առաջարկվում են միլիոնավոր դոլարների կյանք փրկող դեղամիջոցներ և բժշկական պարագաներ։ հիմնադրամին մնում է միայն վճարել առաքման ծախսերը: Մենք ողջունում ենք ձեր առատաձեռն նվիրատվությունները, որպեսզի կարողանանք այս արժեքավոր օգնությունը շարունակել Հայաստանի բոլոր բժշկական կենտրոններին», – ասաց հիմնադրամի նախագահ Հարութ Սասունյանը:
