Ապօրինի ծագում ունեցող գույքի բռնագանձման վարույթի շրջանակներում դատախազություն են հրավիրվել Գոհար Քյալյանը, Սամվել Մայրապետյանը և այլք
Մխիթար Հերացու անվան բժշկական համալսարանի նախկին ռեկտոր Գոհար Քյալյանը ծանուցում է ստացել հուլիսի 4-ին ներկայանալ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն:
«Ղեկավարվելով «Ապօրինի ծագում ունեցող գույքի բռնագանձման մասին» օրենքի 16-րդ և 17-րդ հոդվածներով, ծանուցում եմ, որ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունում Սամվել Ալբերտի Մայրապետյանին պատկանող գույքի առնչությամբ իրականացվում է ուսումնասիրություն, որի արդյունքում կազմվել է ամփոփագիր»,- նշված է ՀՀ դատախազության հանրայնացված ծանուցման մեջ:
Սույն գործի շրջանակներում նույն օրը դատախազություն ներկայանալու ծանուցումներ էին ստացել նաև Սամվել Մայրապետյանը, Լևոն Սուլթանյանը և այլք:
Հիշեցնենք՝ Սամվել Մայրապետյանը Գոհար Քյալյանի ամուսինն է:
