«Ի գիտություն ենք ընդունում». Պեսկովը պատասխանել է Փաշինյանին
Մոսկվան ի գիտություն է ընդունում և հաշվի է առնում Երևանի դիրքորոշումը, որ Հայաստանը Ռուսաստանի դաշնակիցը չէ Ուկրաինայի հակամարտությունում։ Այս մասին այսօր լրագրողներին ասել է ՌԴ նախագահի մամուլի քարտուղար Դմիտրի Պեսկովը։
«Սա կարևոր հայտարարություն է, մենք գիտենք, որ Հայաստանի մոտեցումներում կան որոշակի նրբերանգներ Ուկրաինայի շուրջ հակամարտության վերաբերյալ, մենք դրանք հաշվի ենք առնում, գիտենք»,- ասել է Պեսկովը։
Պեսկովը նաև ընդգծել է, որ իրենք շարունակում են զարգացնել հայեցակարգային դաշնակցային հարաբերությունները Հայաստանի հետ։
Հիշեցնենք, որ Նիկոլ Փաշինյանը մայիսի 4-5-ին Չեխիայի Հանրապետություն կատարած պաշտոնական այցի շրջանակում CNN primanews հեռուստաընկերությանը տված հարցազրույցի ժամանակ ասել էր, որ Ռուսաստանում տեսնում են, որ մենք Ուկրաինայի պատերազմում իրենց դաշնակիցը չենք։
«Արևմուտքում նկատում են, որ մենք Ռուսաստանի դաշնակիցն ենք, ավելի շատ դա են նկատում, Ռուսաստանում տեսնում են, որ մենք Ուկրաինայի պատերազմում իրենց դաշնակիցը չենք, և ստացվում է, որ մենք այս իրավիճակում ոչ մեկի դաշնակիցը չենք, ինչը նշանակում է, որ խոցելի ենք»,-ասել էր Նիկոլ Փաշինյանը։
