Երեխաների պաշտպանության օրը Երևանում կնշվի հետաքրքիր մշակութային միջոցառումներով
Երեխաների պաշտպանության միջազգային օրվա շրջանակում հունիսի 1-ին Երևանում մի շարք միջոցառումներ կանցկացվեն:
«Արմենպրես»-ը ներկայացնում է դրանցից մի քանիսը:
Ալեքսանդր Սպենդիարյանի անվան օպերայի և բալետի ազգային ակադեմիական թատրոնում ժամը 19:00-ին կներկայացվի
Կարեն Խաչատրյանի «Չիպոլինո» բալետը: Մինչ ներկայացման սկիզբը ժամը 18։00-ից սկսած թատրոնի երկրորդ հարկի ճեմասրահում տեղի կունենա մի խումբ տաղանդաշատ երեխաների
ձեռագործ աշխատանքների և նկարների ցուցահանդես։
«Մեզ համար անչափ կարևոր է փոքր տարիքից բարձրաճաշակ հանդիսատես ձևավորելը և մեծացնել երեխաների հետաքրքրությունը օպերային և բալետային արվեստների նկատմամբ»,-ասվում է օպերային թատրոնի տարածած հաղորդագրության տեքստում:
Հայաստանի ազգային ֆիլհարմոնիկ նվագախումբը մանուկների տոնը կնշի «ՄուլտՖԻԼ» ծրագրով, որը տեղի կունենա ժամը 19:00-ին «Արամ Խաչատրյան» համերգասրահում: Կհնչեն երեխաների կողմից սիրված մեղեդիներ՝ հեքիաթային ֆիլմերից և մուլտֆիլմերից
Մինչև 7 տարեկան երեխաների մուտքն անվճար է:
Հունիսի 1-3-ը «Զանգակ» գրատան կողմից Երևանի «Անգլիական» այգում կկազմակերպվի «Մանկական գրքի փառատոնը», որն իր ձևաչափով և մասշտաբով առաջինն է Հայաստանում։ Փառատոնը միայն ժամանցային նախաձեռնություն չէ, այն ունի մեծ կրթական, մշակութային և սոցիալական նշանակություն։ Փառատոնի շրջանակներում տեղի են ունենալու կրթական, մշակութային և ժամանցային ծրագրեր, մանկական ու մանկապատանեկան գրքերի շնորհանդեսներ, երեխաների զարգացմանը նպաստող դասախոսություններ և զրույցներ և խաղեր: Փառատոնի նպատակն է երեխաների օրը դարձնել տոն՝ նրանց համախմբելով գրքի շուրջ: Փառատոնի պաշտոնական բացումը տեղի կունենա հունիսի 1-ին՝ 13:00-ին:
Նույն օրը՝ ժամը 14:00-ին «Զանգակ» հրատարակչության կողմից կհայտարարվի Ամառային ընթերցանություն 2022-ի մեկնարկը։ Ժամը 19:00-ին տեղի կունենա Հայաստանի բեսթսելերների ցանկը գլխավորող «Հարրի Փոթեր» վիպաշարի հինգերորդ հատորի՝ «Հարրի Փոթերը և Փյունիկի միաբանությունը» շնորհանդեսը:
