Մեկ շաբաթում Երևանում քիմիական թունավորումների 21 դեպք է գրանցվել
«Հաշվետու ժամանակահատվածում գրանցվել են հետևյալ ինֆեկցիոն հիվանդությունները. աղիքային վարակի՝ 21 դեպք, ջրծաղիկի՝ 192, թոքաբորբով ուղեկցվող սուր շնչառական վարակների՝ 44 դեպք: Ունենք քիմիական թունավորումների 21 դեպք»,- Երևանի քաղաքապետարանում գործակարգավարական խորհրդակցության ժամանակ հայտնեցին Հիվանդությունների վերահսկման և կանխարգելման ազգային կենտրոնից:
Նշվեց, որ սննդային թունավորման դեպքեր Երևան քաղաքի բնակիչների շրջանում չի արձանագրվել: Կորոնավիրուսային վարակի 2209 դեպք է գրանցվել՝ նախորդ շաբաթվա 5082 դեպքի փոխարեն:
Սննդամթերքի անվտանգության տեսչական մարմնից էլ տեղեկացրեցին, որ նախորդ շաբաթվա ընթացքում ՍԱՏՄ թեժ գծի հեռախոսահամարին գրանցվել է 7 ահազանգ, որոնք վերաբերել են սանիտարահիգիենիկ նորմերի խախտմանն ու մակնշման խնդիրներին: Բոլոր ահազանգների մասով իրականացվել են դիտարկումներ:
Շտապբուժօգնություն ՓԲԸ-ից էլ հայտնեցին, որ կանչերի ընդհանուր քանակը 6738 է: Հիվանդանոց է տեղափոխվել 931 հիվանդ:
«Երևանի ավտոբուս» ՓԲԸ-ից էլ տեղեկացրեցին, որ մարտի 1-ից համար 31 և 8 միկրոավտոբուսային երթուղիները փոխարինվելու են համար 31 և 11՝ «Ժոնգ տոնգ» մակնիշի նոր ավտոբուսային երթուղիներով:
Հաջորդ փոփոխությունները կլինեն ապրիլի 1-ից, մայիսի 1-ից:
Երևանի քաղաքապետ Հրաչյա Սարգսյանը խոսեց նաև Երևանի մի շարք շենքերի մասին, որոնց մուտքերը դռներ չունեն:
Նա կարևորեց գույքագրում իրականացնելը, որպեսզի մինչև տարեվերջ այնպես անեն, որ ընդհանրապես չլինի մուտք, որը որ չի ունենա դուռ:
«Գողության դեպքերը հիմնականում տեղի են ունենում այն շենքերում, որտեղ որ չկա դուռ»,- նշեց Հրաչյա Սարգսյանը:
