Իրանում ՀՀ դեսպանին հե՞տ են կանչում. մեկնաբանում է ՀՀ ԱԳՆ-ն
Մամուլում տեղեկություններ են շրջանառվում, թե ԻԻՀ-ում ՀՀ դեսպան Արտաշես Թումանյանը հետ է կանչվում Երևան: «Հրապարակ» օրաթերթը մասնավորապես գրել է, որ թեմայի վերաբերյալ տեղեկատվությունն իրարամերժ է։
«Մի աղբյուրից ստացած ինֆորմացիայով՝ իրանական կողմը դժգոհություններ է հայտնել դեսպանի աշխատանքից, և դա է հետկանչի պատճառը, չնայած Արտաշես Թումանյանն արդեն 6 տարի այդ պաշտոնում է, և կարող է հետկանչը տեղավորվել «Դիվանագիտական ծառայության մասին» օրենքով նախատեսված ռոտացիայի շրջանակներում։ Սակայն մեկ այլ աղբյուր հայտնեց, որ Թումանյանին հետ են բերում Հայաստան, որպեսզի ԱԳ փոխնախարար նշանակեն։
Բանն այն է, որ Ա․ Թումանյանը 1999-2000 թվականներին եղել է ԱԳ առաջին փոխնախարար, ապա՝ ՀՀ նախագահի աշխատակազմի ղեկավար, դրանից առաջ՝ պատգամավոր, հարկայինի պետ, այսինքն՝ փորձառու չինովնիկ է, իսկ քանի որ կառավարման համակարգում անտերություն է, և աշխատանքային կարգապահությունն էլ խիստ նվազել է, լավ կառավարիչ են փնտրում, և նա հարմար է այդ պաշտոնի համար։ Պարոն Թումանյանը մեր գրավոր հարցը՝ իր հետկանչի մասին, կարդաց և չպատասխանեց»,- գրել է թերթը։
168.am-ը ՀՀ ԱԳՆ մամուլի խոսնակ Աննա Նաղդալյանին խնդրեց մեկնաբանել տվյալ տեղեկությունը, ինչին ի պատասխան՝ նա ասաց, որ այս հարցերում ընդունված կարգը չի խախտում:
«Դեսպանների նշանակումների և հետկանչումների մասին մեկնաբանում եմ, երբ լինում է համապատասխան հրաման»,- ընդգծեց Աննա Նաղդալյանը:
