Մենք ներդնում ենք ամեն հնարավոր ջանք՝ աջակցելու Հայաստանին այս բարդ իրավիճակում. ԵՄ դեսպանը ամանորյա ուղերձ է հղել
Հայաստանում Եվրոպական միության պատվիրակության ողջ անձնակազմը ներդնում է ամեն հնարավոր ջանք՝ աջակցելու Հայաստանին այս բարդ իրավիճակում։ Այս մասին իր ամանորյա ուղերձում նշել է Հայաստանում Եվրոպական միության պատվիրակության ղեկավար, դեսպան Անդրեա Վիկտորինը։
Նա, մասնավորապես, նշել է.
«Մոտենում են տոնական օրերը, երբ մենք, որպես կանոն կարող էինք հանդիպել մտերիմների հետ, ճաշակել համեղ ուտեստներ, փոխանակել նվերներ, այցելել հարազատներին եւ ընկերներին։
Կարծում եմ, որ այս անգամ տոնակատարումները բավականին կտարբերվեն։ Այս տարին ավարտում ենք առերեսվելով ողբերգական իրադարձությունների, որոնք խիստ ծանր ազդեցություն ունեցան Հայաստանի եւ հայ ժողովրդի վրա։
Տարեսկզբին մոլեգնած Քովիդ համավարակի հետեւանքով կորսվեցին մարդկային կյանքեր, առողջություն, ինչպես նաեւ տնտեսական անվտանգությունը։ Լեռնային Ղարաբաղի պատերազմում կորսվեցին մարդկային կյանքեր, առողջություն, ինչպես նաեւ կայունության զգացողությունը։ Սիրտս լցված է վշտով եւ կարեկցանքով այն մարդկանց հանդեպ, ովքեր կորցրել են իրենց սիրելիներին։ Չնայած, որ ինձ համար ծանր է ասել, սակայն բոլորս գիտենք, որ դժվարություններն այսքանով չեն ավարտվել։
Հայաստանում այս պահին գրանցված է 90 000 տեղահանված անձ, որոնք հնարավորություն չունեն տոներն անցկացնել իրենց տներում։ Այս բարդ ժամանակահատվածում 20 000 հյուրընկալ ընտանիք իր դռներն է բացել եւ ընդունել պատերազմից Հայաստան փախած անձանց՝ առաջարկելով հյուրընկալություն։ Տեղական եւ միջազգային կազմակերպություններն օգնում են ինչպես կարողանում են։ Դեռեւս ընթացող համավարակի պայմաններում յուրաքանչյուրիս փրկության համար աշխատում են առողջապահության ոլորտի հազարավոր աշխատակիցներ, ուսուցիչներ, ոստիկաններ եւ այլք՝ վտանգելով սեփական առողջությունն ու կյանքը։
Խոսելով Հայաստանում Եվրոպական միության պատվիրակության ողջ անձնակազմի՝ բոլորիս անունից, խոստանում եմ, որ մենք ներդնում ենք ամեն հնարավոր ջանք՝ աջակցելու Հայաստանին այս բարդ իրավիճակում։
Համավարակի բռնկման սկզբից եւեթ, մենք համավարակի հետեւանքների չեզոքացման ուղղությամբ մեծ աշխատանք ենք կատարել։ Թիմ կազմելով տեղական կազմակերպությունների հետ՝ կենցաղային պարագաների կարիք ունեցող անձնաց ապահովել ենք սննդով եւ հիգիենայի պարագաներով, իսկ երեխաներին՝ պլանշետներով, նրանց ուսումը տանը շարունակելու նպատակով։ ԵՄ անդամ պետությունների հետ միասին, հիվանդանոցներին ապահովել ենք բժշկական սարքավորումներով։ ԵՄ երկրներից Հայաստան ժամանած բժշկական ոլորտի բազմաթիվ արհեստավարժ մասնագետներ աջակցել են իրենց հայաստանյան գործընկերներին։ Դրամաշնորհ ենք հատկացրել փոքր բիզնեսներին: 2021 թվականին նախատեսվում է հավելյալ աջակցություն ուղղել մասնավոր հատվածին։ Մինչ այժմ մենք տրամադրել ենք 35.6 մլն եվրո ՀՀ կառավարությանը՝ աջակցելու խոցելի խմբերի ընտանիքներին եւ գործարարությանը։
Մեր անդամ պետությունների հետ միասին, ԼՂ պատերազմի հետեւանքով տուժած բնակչությանը ցուցաբերել ենք հումանիտար աջակցություն։ Եվրոպական հանձնաժողովը տրամադրել է 3.9 մլն եվրո աջակցություն՝ տարածաշրջանում հակամարտության հետեւանքով տուժած քաղաքացիական բնակչությանը աջակցելու նպատակով։ Մենք շարունակում ենք մեր համագործակցությունը տեղական կազմակերպությունների հետ՝ ԼՂ-ից տեղահանված բնակիչներին տրամադրելով սնունդ, հիգիենայի անհրաժեշտ պարագաներ, ինչպես նաեւ հոգեբանական աջակցության: Միաժամանակ գիտակցում ենք, որ պետք է անել շատ ավելին, եւ մենք մեծ աշխատանք ենք կատարում՝ ձեզ աջակցելու նպատակով։
Սիրելի հայ ժողովուրդ,
Բնականոն հանգամանքներում, ես կմաղթեի բոլորիս ուրախ Նոր Տարի։ Սակայն այսօր համեստորեն մաղթում եմ ձեզ, որ գալիք տարին լինի հույսի եւ խաղաղության, ինչպես նաեւ առողջության համավարակի վերջն ազդարարող տարի։
Նաեւ ցանկանում եմ կորով՝ հանուն ձեզ, ձեր սիրելիների, ինչպես նաեւ Հայաստանի համար։ Ավելի լավ եւ պայծառ օրերը թող շուտ գան։
Շնորհակալություն»:
