Արմեն Սարգսյանը հանդիպել է Արման Թաթոյանի, Եղիշե Կիրակոսյանի, Սիրանուշ Սահակյանի, Արտակ Զեյնալյանի և Արա Ղազարյանի հետ
Հանրապետության նախագահ Արմեն Սարգսյանն այսօր հանդիպում է ունեցել Մարդու իրավունքների պաշտպան Արման Թաթոյանի, Մարդու իրավունքների եվրոպական դատարանում Հայաստանի ներկայացուցիչ Եղիշե Կիրակոսյանի, փաստաբաններ Սիրանուշ Սահակյանի, Արտակ Զեյնալյանի և Արա Ղազարյանի հետ:
Հանդիպման մասնակիցները ներկայացրել են պատերազմի ընթացքում և հետպատերազմյան ժամանակահատվածում կատարված և նախատեսվող միջազգային իրավական պաշտպանության միջոցառումները:
Մարդու իրավունքների պաշտպանը նշել է, որ ադրբեջանական զինված ուժերի կողմից մեր հայրենակիցների իրավունքների կոպիտ խախտումները բնույթով այնպիսին են, որ պահանջում են իրավական պատասխանատվության տարբեր գործընթացներ, որոնք պետք է նախաձեռնվեն միաժամանակ՝ բացառելու համար այդ խախտումների համար անպատժելիությունը և նպաստելու համար դրանց հետագա կանխարգելմանը:
Հանրապետության նախագահն ընդգծել է միջազգային իրավունքով և գործիքակազմով ընձեռվող բոլոր հնարավորություններն արդյունավետ օգտագործելու կարևորությունը և միջազգային իրավական պաշտպանության ոլորտի մասնագետների ամբողջ ներուժը կենտրոնացնելու, համակարգված ու փոխհամաձայնեցված գործելու անհրաժեշտությունը:
