Նախկին փոխոստիկանապետ Լևոն Երանոսյանի գործով դատաքննության ընթացքում հետազոտվեցին տեսանյութերը
Երևանի ընդհանուր իրավասության դատարանում դատավոր Հարություն Մանուկյանի նախագահությամբ ընթացող ոստիկանության զորքերի նախկին հրամանատար, ոստիկանության գեներալ-լեյտենանտ Լևոն Երանոսյանի գործով դատակաքննության ապացույցների հետազոտման փուլն է: Դատարանն անցել է գործում ներգրավված տեսանյութերի հետազոտմանը, դրանք ցուցադրելուց հետո կողմերը հանդես եկան հայտարարություններով:
Այսօրվա դատական նիստին ներկա էր նաև գործով տուժող ճանաչված ԱԺ փոխխոսնակ Ալեն Սիմոնյանը:
Դատական նիստերի դահլիճում հետազոտվեցին Բաղրամյան պողոտայում նկարահանված տեսանյութերը: Ցուցադրված կադրերից կարելի էր ենթադրել, որ ոստիկանները լուսարձակող նռնակներ են օգտագործում: Մեկ այլ տեսանյութում, պաշտպանական կողմի բնորոշմամբ, երևում էր, թե ինչպես է քաղաքացին փորձում ոստիկանից խլել սաղավարտը:
Տուժողներից մեկը տեսանյութերը ցուցադրելուց հետո հայտարարեց, որ իր վրա հենց նախկին փոխոստիկանապետ Լևոն Երանոսյանն է նետել լուսաձայնային նռնակը: Նիստից հետո լրագրողների հետ զրույցում Երանոսյանը հաստատեց, որ 2 լուսաձայնային նռնակ է նետել և այդ մասին ասել է ավելի վաղ: Այլ բան չավելացրեց:
Հաշվի առնելով, որ կար նշանակված այլ դատական նիստ, դատավոր Հարություն Մանուկյանը հետաձգեց այսօրվա դատական նիստը: Դատական հաջորդ նիստը տեղի կունենա մարտի 23-ին:
Հիշեցնենք, որ Լևոն Երանոսյանին մեղադրանք է առաջադրվել Քրեական օրենսգրքի 309 հոդվածների 1-ին և 2-րդ մասերով՝ պաշտոնեական լիազորություններն անցնելու հատկանիշներով: Ըստ քրեական գործով ձեռք բերված տվյալների՝ Երանոսյանը հատուկ միջոցների գործադրմամբ դիտավորությամբ կատարել է այնպիսի գործողություններ, որոնք ակնհայտորեն դուրս են եկել իր լիազորությունների շրջանակից և էական վնաս են պատճառել քաղաքացիներին և անզգուշությամբ առաջացրել ծանր հետևանքներ։
ՀՀ ոստիկանության ներքին զորքերի նախկին հրամանատարի նկատմամբ խափանման միջոց էր ընտրվել ստորագրությունը երկրից չհեռանալու մասին:
Լևոն Երանոսյանը Հատուկ քննչական ծառայություն էր հրավիրվել 2018 թվականի ապրիլի 16-ին և 22-ին, համապատասխանաբար, Բաղրամյան պողոտայում և Արցախի փողոցի սկզբնամասում տեղի ունեցած բախումների ընթացքում հատուկ միջոցներ կիրառելու գործով:
Քրեական գործով դեռ առաջին դատական նիստում Լևոն Երանոսյանն իրեն առաջադրված մեղադրանքները չէր ընդունել՝ դրանք համարելով անհիմն:
«Իմ ծառայության ողջ ընթացքում, ինչպես նաև 2018 թվականի ապրիլի 16-ին և 22-ին Երևան քաղաքում տեղի ունեցած իրադարձությունների ընթացքում, գործել եմ՝ բացառապես ծառայելով Հայաստանի ազգային և պետական շահերին»,- ասել էր Երանոսյանը:
