Իրանի դեմ ճնշման հույսը Թեհրանի գագաթնաժողովն է
ԱՄՆ-ը հուսով է` Չմիավորման շարժման գագաթնաժողովի անդամները Թեհրանում ճնշում կգործադրեն Իրանի իշխանությունների վրա:
«Մենք հուսով ենք` նրանք, ովքեր որոշել են մասնակցել համաժողովին, ներառյալ ՄԱԿ-ի գլխավոր քարտուղար Պան Գի Մունը, իրանցիներին կոշտ կասեն, որ նրանցից ակնկալում են միջազգային պարտավորությունների կատարում»,- հայտարարել է ԱՄՆ պետդեպի պաշտոնական ներկայացուցիչ Վիկտորյա Նուլանդը, որի խոսքերը մեջբերում են համացանցային լրատվամիջոցները:
Նրա խոսքով` դա վերաբերում է «վեցյակի» (ՄԱԿ ԱԽ-ի 5 մշտական անդամներն ու Գերմանիան) և Իրանի միջև իրանական միջուկային ծրագրի վերաբերյալ բանակցություններին:
Նուլանդը նկատում է, որ Իրանը «պետք է բացատրի իր միջուկային ծրագիրն ու խնդիրը լուծի դիվանագիտական ճանապարհով»:
Ավելի քան 100 երկրների պատվիրակությունները խոստացել են Թեհրանում մասնակցել Չմիավորման շարժման գագաթնաժողովին, ընդ որում, շուրջ 30 պետություն ներկայացված կլինի նախագահի, փոխնախագահի կամ վարչապետի մակարդակով:
Գագաթնաժողովն Իրանում կանցնի օգոստոսի 26-31-ը:
