Թուրքիայի նախագահը սիրիական հարցով առանձնազրույցներ է ունեցել
Իսլամական համագործակցության կազմակերպության գագաթնաժողովի շրջանակներում հանդիպում են ունեցել Թուրքիայի նախագահ Աբդուլլահ Գյուլը և Իրանի նախագահ Մահմուդ Ահմադինեջադը:
Ինչպես տեղեկացնում է թուրքական «Անադոլու» գործակալությունը, քննարկման հիմնական թեման Սիրիայի հարցն է եղել:
Նրանք նշել են, որ անհանգստացած են Սիրիայում տեղի ունեցող իրադարձություններով: Կողմերը քննարկել են նաև Սիրիայի հարցով հետագա անելիքները: Հանդիպման այլ մանրամասներ չեն հաղորդվում:
Գյուլն առանձնազրույց է ունեցել նաև Լիբիայի ժամանակավոր նախագահ Մուհամմեդ Յուսուֆ ալ Մագարիֆի հետ: Գյուլը նշել է, որ նոր նախագահն այս պատմական փուլում կարևոր առաքելություն ունի և շնորհավորել է Կադաֆիի դեմ ուղղված հաջող պայքարի համար: Լիբիայի նոր նախագահն էլ նշել է, որ «Թուրքիան իրենց համար դպրոց է»:
Սիրիական հարցը Գյուլը քննարկել է նաև Լիբանանի վարչապետ Նեջիփ Միքաթիի հետ: Գյուլը խորհուրդ է տվել կանխել Սիրիայի դեպքերի տարածումը:
