ԱԺ արտաքին հարաբերությունների հանձնաժողովը փակ քննարկում կանցկացնի արտգործնախարարի հետ
ՀՀ ազգային ժողովի արտաքին հարաբերությունների հանձնաժողովը փակ քննարկում կանցկացնի ՀՀ արտաքին գործերի նախարար Զոհրաբ Մնացականյանի հետ:
Այս մասին ԱԺ-ում լրագրողների հետ զրույցում ասաց «Լուսավոր Հայաստան» խմբակցության ղեկավար Էդմոն Մարուքյանը` անդրադառնալով լրագրողների հարցին, թե կո՞ղմ են, արդյոք, որ Արցախի խնդրի կարգավորման հետ կապված խորհրդարանական լսումներ սկսվեն:
«Արտգործնախարարը մարտի 15-ին ԱԺ արտաքին հարաբերությունների հանձնաժողովում մասնակցելու է փակ քննարկման: Եթե ուզում ենք, որ խոսակցությունն անկաշկանդ լինի, շատ կարևոր է, որ նման նուրբ հարցերը փակ ռեժիմով քննարկվեն: Իսկ խորհրդարանական լսումն այլ գործիք է: Միգուցե մի օր էլ խորհրդարանական լսում անենք»,- ասաց Մարուքյանը:
Նա նշեց, որ խորհրդարանն ունի մի շարք գործիքներ` լսումներ, փակ հանդիպումներ, հարց ու պատասխաններ, գրավոր հարցումներ: Հիմա խորհրդարանականները որոշում են, թե ինչպես պետք է օգտագործել այդ գործիքը:
«Այս փուլում արտաքին հարաբերությունների մշտական հանձնաժողովը նախաձեռնել է հանդիպում ՀՀ արտաքին գործերի նախարարի հետ: Միգուցե այդ հանդիպումից հետո լսում կազմակերպելու կարիք լինի ,-ասաց Մարուքյանն ու ընդգծեց, որ ամեն գործիքի կիրառում պետք է իր նպատակն ունենա:
