«Եթե որևէ մեկը փորձի բան ասել, իր եղածն ու արածը «Կենտրոն» հեռուստաընկերությամբ և հանրության մեջ կասեմ՝ ինչ է, ով է, ինչի շնորհիվ». Գագիկ Ծառուկյան

«Միայն բարեգործությամբ երկիր չես կառուցի։ Ամեն մեկն էլ ուզում է՝ ինքը օգտակար լինի, ինքը երկիր կառուցի»,- իջևանցիների հետ հանդիպման ժամանակ այս մասին ասաց ԲՀԿ առաջնորդ, ցուցակի առաջին համար Գագիկ Ծառուկյանը՝ ընդգծելով, որ քաղաքացիներին պետք է աշխատելու հնարավորություն տալ։

«Մեր ժողովրդի ժպիտը չպետք է կորցնենք։ Իրենք հույսով-հավատով սպասում են, որ լավ է լինելու։ Պետք է միասնական լինել. Կապ չունի կուսակցական պատկանելությունը, կապ ունի մարդու փորձը, գիտելիքը, արդյունավետությունը, որ կարողանա քարը քարին դնի։ Մարդը կյանքում քարը քարին չի դրել, մի ծառ չի տնկել, ոչ մի ոլորտ չի զարգացրել ու խոսում է զարգացումից։ Մարդը պետք է արած-դրած ունենա։ Ցանկացած խնդիր լուծվում է ծանոթությամբ, լուծվում է արած գործով, ընկերական կապերով։ Բոլոր հարցերը լուծելի են»,- հայտարարեց նա։

ԲՀԿ առաջնորդը նկատեց՝ ժողովրդի հետ խոսել չի լինում, բոլորը հոգսերի մեջ են. «Դա պետք է հասկանալ, գնահատել և այդ մարդկանց մատից փուշ հանել։ Մենք այսօր պետք է ուշադրություն դարձնենք գիտությանը. ցանկացած երկրում տնտեսությունը զարգանում է գիտության հիման վրա։ Մենք պետք է ցանկացած ոլորտ զարգացնենք, կարողանանք ներգաղթ կազմակերպել։ Ես հաճախ հանդիպում, զրուցում եմ մարդկանց հետ, կարոտները սրտներում՝ ուզում են վերադառնալ իրենց հայրենիք, ուզում են՝ իրենց երեխաները կրթություն, դաստիարակություն ստանան հայրենիքում, բայց ասում են՝ ո՞նց գանք, եղածը ծախել, գնացել ենք։ Ես չեմ ասում՝ 100 տոկոսն են գալու, բայց 70-80 տոկոսը գալու են։ Այնպես որ, որոշողը դուք եք, ոնց կորոշեք, ում ձայն կտաք, համապատասխան կպահանջեք։ Ես արել եմ, անում եմ, անելու եմ։ Ծառուկյանը եղել է, կա, կմնա, ես ուզում եմ՝ իմ ժողովուրդը լավ ապրի»։

Ծառուկյանը նկատեց՝ ուժեղ մարդը որևէ մեկին չի վիրավորում. «Ես իմ թիմին զգուշացրել եմ, որ, եթե որևէ մեկի հասցեին վատ բան ասեն, փորձեն դրանով իրենց հեղինակությունն ավելացնել, կուսակցությունից կհեռացվեն։ Դուք ձեր գործը ներկայացրեք, ժողովուրդն էլ ում կուզի՝ թող իր ձայնը տա։ Բայց եթե որևէ մեկը փորձի բան ասել, իր եղածն ու արածը «Կենտրոն» հեռուստաընկերությամբ և հանրության մեջ կասեմ՝ ինչ է, ով է, ինչի շնորհիվ է»։