«Հայաստանը հիմա մի երկիր է, որտեղ 3 մլն վարչապետ կա». Նիկոլ Փաշինյան
«Իմ քայլը» դաշինքի առաջնորդ, ՀՀ վարչապետի պաշտոնակատար Նիկոլ Փաշինյանն այսօր Բերդում նախընտրական հանրահավաքի ժամանակ խոստացավ՝ ինչպես ազատ ու արդար ընտրություններում ստանձնել է իշխանությունը, այնպես էլ ազատ ու արդար ընտրություններում հանձնել այն։ Սա նա համարեց իրենց ամենակարևոր առաքելությունը։
«Մենք ինչքան էլ լավ իշխանություն լինենք, մեկ է՝ մի օր հայտնվելու է այլ քաղաքական ուժ, որը կարողանալու է շահել ժողովրդի համակրանքը, և դա է մեր ամենապատասխանատու պահը, որ մենք մի ձայնով անգամ չկեղծենք ու չխեղաթյուրենք ժողովրդի քվեն»,- ասաց Ն.Փաշինյանը։
Նա պահը պատմական անվանեց, քանի որ ժողովուրդն է որոշելու՝ ով լինի իշխանության. «Իմ 6.5 ամսվա վարչապետության ամենամեծ արդյունքն էն է, որ ժողովրդին վերադարձվել է բարձրագույն իշխանությունը»։
«Հայաստանը հիմա մի երկիր է, որտեղ 3 մլն վարչապետ կա»,- ասաց Ն.Փաշինյանը՝ պարզաբանելով, որ այդ 3 մլն-ից յուրաքանչյուրը որոշում է երկրի ճակատագիրը՝ իր մի քվեով։
«Մենք իշխանությունը եղունգներով ու ատամներով չենք պահելու։ Երբե՛ք»,- նշեց Փաշինյանը։
