Հայկական վիրտուալ համալսարան, որտեղ հայերեն են սովորում առցանց
Առցանց կրթության գաղափարը վերջին տասնամյակում լայն տարածում է ստացել: Այս մասին տեղեկացնում է «Ամերիկայի ձայնը»:
Սիլիկոնի հովտում այս գաղափարն իրագործվել է նաեւ հայոց լեզու, պատմություն եւ մշակույթ սովորելու համար՝ Հայկական վիրտուալ համալսարանի միջոցով, պատմում է Ամերիկյան Synopsys խոշոր ընկերության գլխավոր ճարտարապետ եւ Synopsys-Armenia ընկերության նախագահ դոկտոր Երվանդ Զորյանը, ով համալսարանի հիմնադիրներից է.
«Սա ինձ համար հետաքրքրական էր, քանի որ իմ տեխնոլոգիայի ոլորտի աշխատանքը եւ իմ ազգային գիծը իրական միավորում էր»:
Զորյանի խոսքով, տարիներ առաջ որպես անհատներին առցանց կրթելու գաղափար սկսված Հայկական բարեգործական ընդհանուր միության նախագիծն այսօր օգնել է ավելի քան 22 հազար անձանց սովորել հայերեն եւ ծանոթանալ հայոց պատմությանն եւ մշակույթին: Ունեն նույնիսկ շախմատի դասեր:
«Այս անձանց 10 տոկոսը հայեր չեն: Հայերի հետ կապ ունեն ընտանեկան, գործի, հետաքրքրությունների պատճառով: 90 տոկոսը հայեր են՝ 97 երկրներից»:
ԱՄՆ-ում հիմնադրված Հայկական վիրտուալ համալսարանն օգնում է հատկապես փոքր հայ համայնքներ ունեցող երկրներում բնակվող հայերին, ովքեր ցանկանում են, որ իրենց երեխաները ծանոթ լինեն հայ մշակույթին.
«Մեր նպատակը մեր լեզուն, մշակույթը, պատմությունը տարածելն է այնտեղ, որտեղ այն հասանելի չէ, որտեղ դպրոցներ չկան եւ միջոցներ չունեն՝ Վենեսուելայից մինչեւ Հոնկոնգ: Եվ մենք կարող ենք իրենց հասնել ինտերնետի միջոցով»:
Այսօր համալսարանն առաջարկում է հայոց լեզվի, ինչպես նաեւ պատմության եւ մշակույթի դասընթացներ յոթ լեզուներով՝ արեւելահայերենից եւ արեւմտահայերենից մինչեւ անգլերեն, ֆրանսերեն, իսպաներեն, ռուսերեն եւ թուրքերեն: Ամենափոքրերը կարող են դասընթացներին մասնակցել մեծերի հսկողությամբ՝ որպեսզի կարգապահությունը չտուժի, իսկ 16-ից բարձր տարիք ունեցող բոլոր ցանկացողները կարող են ստանալ անհատական դասընթացներ կամ մասնակցել ընդհանուր դասերին՝ առցանց:
Արդյունքում, Երվանդ Զորյանի խոսքով, ոչ միայն տարածվում է հայերենը, այլեւ մարդիկ կարող են ընկերանալ աշխարհի հակառակ կողմում գտնվող համադասարանցիների հետ՝ ստեղծելով լայն ցանց:
