Ռուբեն Ռուբինյանի «յուրահատուկ» ժեստը՝ ԱԺ աշխատակազմի ղեկավար-գլխավոր քարտուղարին
ԱԺ ապագա նախագահ Ռուբեն Ռուբինյանը հերթական կարգադրությունն է ստորագրել՝ Ազգային ժողովի աշխատակազմի ղեկավար-գլխավոր քարտուղար Դավիթ Առաքելյանին պարգևատրելու վերաբերյալ։
«Ղեկավարվելով «Ազգային ժողովի կանոնակարգ» սահմանադրական օրենքի 5-րդ հոդվածի 2-րդ մասի 22-րդ կետով և հիմք ընդունելով Հայաստանի Հանրապետության Ազգային ժողովի խորհրդի 2017 թվականի դեկտեմբերի 27-ի «Հայաստանի Հանրապետության Ազգային ժողովի և Հայաստանի Հանրապետության Ազգային ժողովի նախագահի պարգևներով պարգևատրման կարգը և պարգևների նկարագրությունը հաստատելու մասին» ԱԺԽՈ-045-Լ որոշման 1-ին հավելվածը` կարգադրում եմ.
Պետական գործունեության բնագավառում ներդրած նշանակալի ավանդի, վաստակի և մատուցած ակնառու ծառայությունների համար Ազգային ժողովի աշխատակազմի ղեկավար-գլխավոր քարտուղար Դավիթ Առաքելյանին պարգևատրել ՀՀ Ազգային ժողովի պատվո մեդալով»,- նշված է Ռուբեն Ռուբինյանի ստորագրած կարգադրությունում, որը հրապարկվել է ԱԺ կայքում։
Նշենք, որ ԱԺ արդեն նախկին նախագահ Ալեքն Սիմոնյանի թիմակիցները՝ նրա խոսնակը, օգնականները, խորհրդականները, հերթով ազատման դիմումներ են գրել։
Օրերս լրատվամիջոցները գրել էին նաև, որ պաշտոնը կլքի նաև Դավիթ Առաքելյանը, ով ևս համարվում է Ալեն Սիմոնյանի թիմակիցը։
Ստացվում է՝ Ռուբեն Ռուբինյանը «յուրահատուկ» ժեստ է արել՝ պաշտոնը լքելուց առաջ պարգևատրելով Դավիթ Առաքելյանին։
Հիշեցնենք, որ 2023 թվականի փետրվարին Ալեն Սիմոնյանի կարգադրությամբ Դավիթ Առաքելյանն ազատվել էր ԱԺ նախագահի օգնականի պաշտոնից և նշանակվել ԱԺ աշխատակազմի ղեկավար-գլխավոր քարտուղար:
Ի դեպ, Ռուբեն Ռուբինյանը դեռ ԱԺ նախագահի պաշտոնը չստանձնած, օրերս կարգադրություն էր ստորագրել՝ ԱԺ-ում այսպես ասած՝ անվտանգութւյան կանոնների սահմանելու ու հաստատելու, այդ թվում՝ նաև լրագրողների աշխատանքը սահմանված հատուկ տարածքում իրականացնելու մասին:
