Տյումենի ՆՊԶ-ն ԱԹՍ-ների հարձակումից հետո դադարեցրել է նավթի վերամշակումը

Հուլիսի 25-ից ԱԹՍ-ների հարձակումից հետո Տյումենի նավթավերամշակման գործարանը (ՆՎԳ) լիովին դադարեցրել է նավթահումքի վերամշակումը և նավթամթերքի թողարկումը։ Այս մասին հայտնում է Reuters-ը՝ հղում անելով արդյունաբերական աղբյուրներին։

Նրանց խոսքով՝ «ՌԻ Ինվեստ» ընկերությանը պատկանող գործարանում հարվածի հետևանքով հրդեհ է բռնկվել տարեկան 2,6 միլիոն տոննա հզորությամբ դիզելային վառելիքի հիդրոմաքրման տեղակայման, ինչպես նաև բարձր օկտանային ավտոբենզինների արտադրության համակցված տեղակայման (КУПВБ) վրա։ Reuters-ի զրուցակիցները չգիտեն, թե որքան կարող է տևել բենզինի արտադրության վերանորոգումը։

Տարեկան 9 միլիոն տոննա նավթ վերամշակելու ունակությամբ Տյումենի ՆՎԳ-ն Ռուսաստանում խոշորագույն անկախ նավթավերամշակման գործարանն է։ Նրա բենզինային համալիրը կառուցվել է ամերիկյան UOP ընկերության արտոնագրով և շահագործման է հանձնվել 2018 թվականին։

Տարեկան մոտ 500 հազար տոննա բենզին և մոտ 3 միլիոն տոննա դիզվառելիք արտադրող Տյումենի ՆՎԳ-ն դարձել է վեցերորդ խոշոր նավթավերամշակման գործարանը, որը դադարեցրել է թողարկումը ԱԹՍ-ների հարձակումների պատճառով՝ ամսվա սկզբից ի վեր։ Ավելի վաղ վերամշակումը դադարեցրել էին «Գազպրոմնեֆտեխիմ Սալավատ» ՆՎԳ-ն (հուլիսի 14-ին), «Ռոսնեֆտի» Սըզրանի ՆՎԳ-ն (հուլիսի 12-ին), Սարատովի ՆՎԳ-ն (հուլիսի 8-ին), Օմսկի ՆՎԳ-ն (հուլիսի 6-ին) և «Լուկօյլի» «Նիժնեգորդնեֆտեօրգսինթեզ»-ը (հուլիսի 2-ին)։

Energy Intelligence-ի գնահատականներով՝ հուլիսին Ռուսաստանում նավթամշակման ծավալները նվազել են մինչև օրական 3,58 միլիոն բարել, ինչը կարող է ամենացածր մակարդակը լինել առնվազն 2002 թվականից ի վեր։ Ամսի երկրորդ կեսին վնասված ՆՎԳ-ների մի մասը՝ 40 միլիոն տոննա հզորությամբ, վերադարձել է վառելիքի վաճառքին։ Ընդ որում, տարեկան 45 միլիոն տոննա հզորություն ունեցող խոշոր ձեռնարկությունները շարունակում են պարապուրդի մատնված մնալ։