Ինչպես ընտրել ամենահամեղ և հյութեղ կեռասը
Ամենահամեղ կեռասը սովորաբար շուկաներում և խանութներում հայտնվում է սեզոնի ամենաթեժ շրջանում՝ հունիսի վերջից մինչև հուլիսի կեսերը։ Այս մասին հայտնել է «ЗДРАСТЕ» սրճարանների ցանցի բրենդ-շեֆ Ռոստիսլավ Նովոժիլովը՝ ներկայացնելով հյութեղ և որակյալ կեռաս ընտրելու հիմնական կանոնները։
Մասնագետի խոսքով՝ շատերը կարծում են, թե կեռաս ընտրելը հեշտ է, սակայն դրա համը կախված է ոչ միայն գույնից։ Կարևոր են նաև թարմությունը, պտղի խտությունը, պահպանման պայմանները և նույնիսկ այն, թե ինչ վիճակում են գտնվում տուփի կամ տարայի ներքևի հատիկները։
Նովոժիլովը նշում է, որ մուգ գույնի կեռասը սովորաբար ավելի քաղցր, հյութեղ և հարուստ համ ունի, մինչդեռ վարդագույն և դեղին տեսակները հաճախ առանձնանում են թեթև թթվաշությամբ։ Սակայն գույնը միշտ չէ, որ հասունության ցուցանիշ է, քանի որ որոշ տեսակներ նույնիսկ լիովին հասուն վիճակում մնում են բաց գույնի։
Մասնագետը խորհուրդ է տալիս առաջին հերթին ուշադրություն դարձնել պտղակոթին։ Այն պետք է լինի կանաչ և թարմ տեսք ունենա։ Եթե պտղակոթը չորացած է և շագանակագույն, ապա հավանական է, որ կեռասն արդեն երկար ժամանակ է պահվում։
Լավ կեռասի հատիկները պետք է լինեն ամուր, հարթ և փայլուն՝ առանց ճաքերի, փոսիկների կամ վնասվածքների։ Կարևոր է նաև հոտը. թարմ կեռասը չպետք է խմորման կամ թթված մրգի հոտ ունենա։
Գնման ժամանակ խորհուրդ է տրվում ստուգել ոչ միայն վերևի, այլև տարայի ներքևի շերտերը։ Հենց այնտեղ է սովորաբար կուտակվում խոնավությունը, ինչի հետևանքով հատիկներն ավելի արագ են փչանում։
Տուն բերելուց հետո կեռասը ցանկալի է անմիջապես դնել սառնարանում։ Մասնագետը խորհուրդ է տալիս այն չլվանալ և չհեռացնել պտղակոթերը մինչև օգտագործելը։ Կեռասը կարելի է պահել տարայի կամ թղթե տոպրակի մեջ՝ առանց չափազանց սեղմելու։
«Կեռասը ցանկալի է լվանալ անմիջապես ուտելուց առաջ։ Ցանկալի է այն օգտագործել մի քանի օրվա ընթացքում, քանի որ երկար պահպանման դեպքում կորցնում է իր խտությունն ու համային հատկությունները»,- նշել է Նովոժիլովը։
