Էրդողան. «Թուրքիայում ընդդիմության դեֆիցիտ կա, CHP-ն թաղված է ներքին կռիվների մեջ»
Թուրքիայի նախագահ Ռեջեփ Թայիփ Էրդողանը, «Արդարություն և զարգացում» կուսակցության (AK Parti) Անկարայի կառույցի հետ հանդիպման ժամանակ, հայտարարել է երկրում որակյալ ընդդիմության լուրջ պակասի մասին։
Իր ելույթում Էրդողանը նշել է, որ ցավով է հետևում երկրի երկրորդ ամենամեծ քաղաքական ուժի՝ ընդդիմադիր «Ժողովրդահանրապետական» կուսակցության (CHP) ներկայիս վիճակին, որն, ըստ նրա, հայտնվել է ներքին պառակտումների մեջ։
«Մենք ցավով ենք տեսնում, թե ինչպես է երկրի երկրորդ խոշորագույն կուսակցությունը թաղված ներքին կռիվների և աթոռակռվի մեջ։ Նույնիսկ եթե խոսքը մեր մրցակցի մասին է, մենք ճիշտ չենք համարում, որ Թուրքիայի երկրորդ մեծ կուսակցությունն ասոցացվի միայն կոնֆլիկտների ու լարվածության հետ»,- ընդգծել է Էրդողանը։
Թուրքիայի ղեկավարը հավելել է, որ իրենց քաղաքական ուժն այդպես էլ չի կարողանում արժանի մրցակից գտնել երկրի քաղաքական դաշտում։
«Մեր մակարդակին և որակին համապատասխանող ընդդիմության փնտրտուքները շարունակվում են նաև այսօր»,- հայտարարել է նախագահը։
