Արևմուտքի գերիշխանության դարաշրջանն ավարտված է. Թուրքիայի կուրությունը սպառնում է ազգային անվտանգությանը
«Nefes» պարբերականի իր հերթական հոդվածում թուրք հանրահայտ վերլուծաբան Սոներ Յալչընն անդրադարձել է համաշխարհային տնտեսական ուժերի վերադասավորմանը և կոչ արել Անկարային՝ վերանայել իր արտաքին քաղաքական հին սովորությունները:
Հեղինակը նշում է, որ երկու հարյուր տարի առաջ Թուրքիայի շրջադարձը դեպի Արևմուտք ռացիոնալ քայլ էր, քանի որ հենց այնտեղ էին կենտրոնացված տեխնոլոգիաները, կապիտալն ու արդյունաբերությունը: Սակայն այսօր, ըստ նրա, անցյալի ճշմարտություններին կուրորեն հավատարիմ մնալը վերածվել է Թուրքիայի ազգային անվտանգության գլխավոր ռիսկի:
Յալչընը փաստարկում է համաշխարհային նոր հսկաների ի հայտ գալը.
Չինաստանը վերածվել է աշխարհի խոշորագույն տնտեսության՝ ըստ գնողունակության պարիտետի:
Հնդկաստանն իր տնտեսական ցուցանիշներով առաջ է անցել Գերմանիայից և Ճապոնիայից:
Ռուսաստանը, հակառակ բոլոր կանխատեսումների, դիմակայեց ուկրաինական հակամարտության սկսվելուց հետո կիրառված պատժամիջոցների ճնշմանը և պահպանեց իր ազդեցությունը էներգետիկ շուկաներում:
«ԲՐԻԿՍ (BRICS) երկրների բաժինը համաշխարհային արտադրության մեջ հավասարվել է «Մեծ յոթնյակի» (G7) ցուցանիշներին՝ ակնառու կերպով ապացուցելով, որ Արևմուտքի դոմինանտության դարաշրջանն ավարտված է»,- եզրափակում է Սոներ Յալչընը
