Լրատվամիջոցները հայտնել են Եվրախորհրդարանի ծայրահեղ աջ խմբակցության՝ ԵՄ միջոցների ոչ նպատակային ծախսման մասին
Եվրախորհրդարանի «Հայրենասերներ հանուն Եվրոպայի» ծայրահեղ աջ խմբակցությունը հայտնվել է ֆինանսական սկանդալի կենտրոնում, երբ աուդիտը բացահայտել է ԵՄ միջոցների ոչ նպատակային օգտագործում, գրում է Politico-ն։
Ըստ Եվրախորհրդարանի գաղտնի զեկույցի՝ միավորումը պարտավոր է վերադարձնել ավելի քան 276 հազար եվրո, որոնք խախտումներով են ծախսվել 2024 թվականի երկրորդ կեսին։ Ստուգմամբ հայտնաբերվել են անօրինական նվիրատվություններ, գնումների կանոնների խախտումներ և ընթացակարգային խախտումներ պայմանագրերի կնքման ժամանակ։
Առանձնահատուկ նշվում է, որ միջոցների մի մասը կապված է եղել ֆրանսիական «Ազգային միավորում» կուսակցությանը մատուցված ծառայությունների, ինչպես նաև խմբակցության ներսում քաղաքական կառույցների հետ փոխկապակցված ընկերությունների հետ։
Աուդիտը մատնանշել է նաև խախտումներ հանրային մրցույթների անցկացման և ֆինանսական փաստաթղթերի ձևակերպման ժամանակ, ինչը, ստուգողների կարծիքով, կասկածի տակ է դնում պատշաճ ֆինանսական կառավարման սկզբունքների պահպանումը։
Խմբակցությունը հերքում է մեղադրանքները և հայտարարում եզրակացությունները դատական կարգով բողոքարկելու մտադրության մասին։
