ԵԱՏՄ-ում քննարկվել են առևտրատնտեսական համագործակցության խորացման ուղիները
ԵԱՏՄ հանձնաժողովի կոլեգիայի նախագահ Բակիտժան Սագինտաևը հունիսի 18-ին Կազանում՝ «Ռուսաստան–ԱՍԵԱՆ» գագաթնաժողովի շրջանակում, աշխատանքային հանդիպում է ունեցել Կամբոջայի Թագավորության վարչապետ Հուն Մանետի հետ։
Զրույցի ընթացքում քննարկվել են Եվրասիական տնտեսական հանձնաժողովի (ԵՏՀ) և Կամբոջայի կառավարության միջև փոխըմբռնման հուշագրի շրջանակում համագործակցության առաջնահերթ ուղղությունները։ Կողմերը շարունակում են կանոնավոր և առարկայական երկխոսությունը առևտրատնտեսական համագործակցության լայն շրջանակի հարցերի շուրջ։
«Մեր երկրների միջև առևտրաշրջանառության դրական դինամիկան հաստատվում է թվերով․ 2016 թվականին հուշագրի ստորագրումից ի վեր ԵԱՏՄ անդամ պետությունների և Կամբոջայի միջև ապրանքաշրջանառությունն աճել է 34 տոկոսով։ Միայն 2025 թվականին եվրասիական «հնգյակի» երկրների արտահանումը Կամբոջա ավելացել է 37,8 տոկոսով, ինչը վկայում է կամբոջական շուկայում եվրասիական արտադրողների դերի աճի մասին», – նշել է Բակիտժան Սագինտաևը։
Կողմերը ընդգծել են փոխադարձ առևտրի հետագա ընդլայնման մեծ ներուժը՝ ապրանքատեսականու դիվերսիֆիկացման, մաքսային վարչարարության կատարելագործման, ստանդարտացման և սերտիֆիկացման պահանջների ներդաշնակեցման, ինչպես նաև լոգիստիկ կապերի զարգացման շնորհիվ։
«Առանձնահատուկ նշանակություն ունի գործարար շրջանակների միջև համագործակցությունը։ Այն մեր առևտրատնտեսական գործընկերության հիմնական շարժիչ ուժերից մեկն է։ Նպատակահարմար ենք համարում շարունակել բիզնես-ֆորումների կազմակերպման պրակտիկան՝ ինչպես ԵԱՏՄ անդամ երկրների, այնպես էլ Կամբոջայի գործարար հարթակներում», – նշել է ԵՏՀ կոլեգիայի նախագահը։
Հանդիպման ավարտին կողմերը վերահաստատել են գործնական համագործակցության հետագա խորացման պատրաստակամությունը, այդ թվում՝ ԵԱՏՄ–ԱՍԵԱՆ երկխոսության շրջանակում։
