Լիբանանի հարավում և արևելքում իսրայելական hարձակումների nւժգնացումն ուղղված է խաղաղության հասնելու և hրադադարը հաստատելու ջանքերի դեմ. Լիբանանի նախագահ
Լիբանանի հարավում և արևելքում իսրայելական հարձակումների ուժգնացումն ուղղված է խաղաղության հասնելու և հրադադարը հաստատելու ջանքերի դեմ: Այս մասին հայտարարել է Լիբանանի նախագահ Ժոզեֆ Աունը, հաղորդում է ՏԱՍՍ-ը:
«Այն, ինչ մենք այսօր տեսնում ենք հարավում և Բեկաայում՝ իսրայելական հարձակումների ընդլայնումը, նոր սպանություններն ու ավերածությունները, վտանգավոր և դատապարտելի էսկալացիա է, հատկապես հաշվի առնելով, որ այն ազդել է տասնյակ անմեղ մարդկանց վրա, որոնց թվում՝ կանայք և երեխաներ», – ասված է նախագահի մամուլի ծառայության կողմից հրապարակված Աունի հայտարարության մեջ։
Լիբանանի ղեկավարի խոսքով՝ Իսրայելի գործողություններն իրականում ուղղված են հրադադարը հաստատելու և պատերազմը ավարտելու բոլոր ձեռնարկվող փորձերի դեմ, հատկապես ԱՄՆ-ի և Իրանի միջև տեղի ունեցած վերջին իրադարձություններից հետո։
Աունն ընդգծել է, որ դա չի կանգնեցնի Լիբանանի աշխատանքը՝ հնարավորինս սեղմ ժամկետներում համապարփակ հրադադարի հասնելու ուղղությամբ։ Նրա խոսքով՝ հենց այս խնդիրն է նա առաջադրել լիբանանյան պատվիրակությանը Վաշինգտոնում կայանալիք բանակցությունների առաջիկա փուլում։
Լիբանանի նախագահը նշել է, որ լիակատար հրադադարի հարցում չի կարելի հանդուրժողականություն ցուցաբերել, քանի որ այն մնացյալ թեմաների քննարկման համար անհրաժեշտ պայման է, այդ թվում՝ իսրայելական զորքերի դուրսբերման, լիբանանյան բանակի տեղակայման և գերիների վերադարձի համար։
Ավելի վաղ Լիբանանը և Իսրայելը ԱՄՆ-ի միջնորդությամբ Վաշինգտոնում անցկացրել էին բանակցությունների մի քանի փուլ, որոնք ուղղված էին ռազմական գործողությունների դադարեցմանը և Լիբանանի հարավում իրավիճակի կայունացմանը։
