Ռամզան Կադիրովի որդիները մասնակցել են սաուդյան արքայազնի հետ հանդիպմանը
Չեչենական Հանրապետության կառավարության նախագահի տեղակալ, ֆիզիկական կուլտուրայի և սպորտի նախարար Ախմատ Կադիրովը հանդիպում է ունեցել արքայազն Թուրկի բեն Մուհամմեդ Ալ Սաուդի հետ։ Հանդիպման մասին իր թելեգրամյան ալիքում հայտնել է Չեչնիայի ղեկավար Ռամզան Կադիրովը։
Հանդիպմանը մասնակցել են նաև Ռամզան Կադիրովի որդիները՝ Ալի, Ադամ և Համզատ Կադիրովները։
Բանակցությունների ընթացքում Ախմատ Կադիրովն արքայազնին է փոխանցել պաշտոնական նամակ՝ ուղղված Սաուդյան Արաբիայի թագաժառանգ արքայազն Մուհամմեդ բեն Սալման Ալ Սաուդին։
Կողմերը քննարկել են Չեչենական Հանրապետության և Սաուդյան Արաբիայի միջև երկկողմ փոխգործակցության հարցեր, դրանց թվում՝ հումանիտար և կրոնական ուղղությունները, ինչպես նաև Ռուսաստանից ժամանող ուխտավորների համար հաջի և ումրայի կազմակերպումը։
Առանձնահատուկ ընդգծվել է ռուս-սաուդյան հարաբերությունների ամրապնդման և փոխադարձ հետաքրքրություն ներկայացնող տարբեր ուղղություններով համագործակցության զարգացման կարևորությունը։
Զրուցակիցները Սաուդյան Արաբիան անվանել են մահմեդականների համար առանցքային երկիր, որի տարածքում գտնվում են սրբազան Մեքքա և Մեդինա քաղաքները։ Զգալի ուշադրություն է դարձվել ուխտավորների աջակցության և կրոնական ուղևորությունների ժամանակ նրանց գտնվելու պայմանների բարելավման հարցերին։
Կողմերը պատրաստակամություն են հայտնել հետագա երկխոսության զարգացման և տարածաշրջանների ու երկրների միջև փոխգործակցության ընդլայնման համար։
