Սաուդյան Արաբիայի արքայազնը դարձել է Էվերեստը նվաճած ամենաերիտասարդ արաբներից մեկը
Սաուդյան Արաբիայի արքայազնը պատմության մեջ է մտել որպես Էվերեստը նվաճած ամենաերիտասարդ արաբներից մեկը։ Այս մասին հայտնում է The Tourism Times-ը։
Նորին Թագավորական Մեծություն Մոհամմեդ բին Ֆեյսալ բին Ֆահադ բին Մ. բին Աբդուլազիզ Ալ Սաուդն աշխարհի ամենաբարձր գագաթին հաջողությամբ հասել է ընդամենը 24 տարեկան, 2 ամսական և 5 օրեկան հասակում։
Հաղթական վերելքը տեղի է ունեցել մայիսի 27-ին, առավոտյան ժամը 7:30-ին՝ «Elite Exped» էլիտար խմբի կազմում:
Մոլորակի ամենաբարձր գագաթի նվաճումը արքայազնի համար դարձավ վեցերորդ հաջողությունը «Elite Exped»-ի հետ իրականացվող «Յոթ գագաթներ» ծրագրի շրջանակում։ Այս վեհաշուք նախագիծն ավարտին հասցնելու համար նրան մնացել է նվաճել ևս մեկ գագաթ։
«Elite Exped»-ի ներկայացուցիչները «անսահման հպարտություն» են հայտնել այն բանի համար, որ իրենց վստահվել է ուղեկցել Նորին Թագավորական Մեծությանը այս ճանապարհին, և հավաստիացրել են, որ լիակատար աջակցություն կցուցաբերեն մայրցամաքների բոլոր յոթ ամենաբարձր գագաթները նվաճելու նրա հավակնոտ նպատակի եզրափակիչ փուլում:
