Չիկագոյում ավտոմեքենան վրաերթի է ենթարկել հինգ ոստիկանի
Չիկագոյում հինգ ոստիկան է տուժել քաղաքի արևմտյան հատվածում ծառայություն իրականացնելու ժամանակ ավտոմեքենայի վրաերթի հետևանքով, հայտնում է NBC News-ը։
Միջադեպը տեղի է ունեցել տեղական ժամանակով մոտավորապես 03:20-ին։ Ոստիկանության աշխատակիցները մասնակցում էին մեծ ամբոխի ցրման գործողությանը, երբ հանդիպակաց գոտիով ընթացող կապույտ ավտոմեքենան վրաերթի է ենթարկել նրանց։
Չիկագոյի ոստիկանության տվյալներով, վրաերթից հետո մեքենան դուրս է եկել մայթ, ապա բախվել է պարեկային ավտոմեքենային, սյանը և ցանկապատին, որից հետո կանգ է առել։
Իրավապահները ձերբակալել են 18-ամյա մի երիտասարդի, որը վնասվածքներ չի ստացել։ Ներկայումս որոշվում է նրան մեղադրանք առաջադրելու հարցը։
Ավտոմեքենայում հայտնաբերվել է նաև զենք։
Տուժած բոլոր հինգ ոստիկանները տեղափոխվել են հիվանդանոց։ Նրանց վիճակը գնահատվում է կայուն։ Այլ տուժածներ չեն գրանցվել։
