907-րդ Բանաձևը շարունակում է մնալ Հայաստանի հիմնական քաղաքական ակտիվը ԱՄՆ հետ հարաբերություններում. Էդուարդ Աբրահամյան
Անվտանգության վերլուծության ինստիտուտի ավագ գիտաշխատող, պատմաբան-միջազգայնագետ Էդուարդ Աբրահամյանը ֆեյսբուքյան իր էջում գրում է. «Ադրբեջանը լրջորեն մոբիլիզացրել է իր ողջ կարողությունները. Պետական, լոբբիստական, սփյուռք, օլիգարխատ, երրորդ երկրների հետ դիվանագիտական խողովակներ` ԱՄՆ Կոնգրեսի կողմից 1992-ին ընդունված Ազատության Աջակցության Ակտի 907-րդ բանաձևն ԱՄՆ Կոնգրեսում օրենքով չեղարկելու ուղղությամբ։ Նման մասշտաբային մոբիլիզացիա եղել է մեկ էլ 2020-ին։
Այս անգամ, սակայն, Ադրբեջանի «խաղաղության գործընթացը» Հայաստանի Հանրապետության հետ համակարգայնորեն օգտագործվում էր որպես գործիք այս հարցում և ՀՀ իշխանությունների ներգրավվածությունը` որպես 907-րդ բանաձևը չեղարկելու հավելյալ կողմ։
907-րդ բանաձևն ԱՄՆ հետ հարաբերություններում Հայաստանի Հանրապետության ռազմավարական շահերը սպասարկող հիմնական քաղաքական ակտիվն է եղել, որից, ավաղ, հայկական կողմը երբեք լիարժեք չի օգտվել (եթե երբևէ փորձել է օգտվել ընդհանրապես)։
Վերջին հինգ տարիների ընթացքում Ադրբեջանի կողմից ագրեսիվ գործողությունների, բազմաթիվ հանցագործությունների ու ՀՀ իշխանությունների կողմից բազմաթիվ սխալ որոշումների ֆոնին, որոնք բերեցին ռազմավարական պարտության ու ՀՀ կարգավիճակի ու ազդեցության շեշտակի նվազեցմանը, 907-րդ Բանաձևը շարունակում է մնալ Հայաստանի Հանրապետության հիմնական քաղաքական ակտիվը ԱՄՆ հետ հարաբերություններում՝ հատկապես անվտանգության ու Ադրբեջանի ագրեսիան զսպելու հարցերում»։
