«Նիկոլը պղտորում ու մխտռում է ամեն բան, որևէ արժեք չմնաց, որ այդ տղան չպղծի». Հուսիկ Արա

«Հայ Առաքելական եկեղեցին մեր վերջին հույսն ու պատվարն է, այն ամուր ու կուռ կառույց է։ Եթե այսօր մեր ազգային ինքնության վերջին խարիսխը խարխլվում է, ուրեմն՝ ենթարկվելու ենք նավաբեկության ու ցիրուցան լինենք»,- 168.am-ի հետ զրույցում նման կարծիք հայտնեց բանաստեղծ Հուսիկ Արան՝ խոսելով Առաքելական եկեղեցու շուրջ ստեղծված իրավիճակի և իշխանությունների հակաեկեղեցական քայլերի մասին։

Բանաստեղծը ցավում է այն եպիսկոպոսների համար, ովքեր երկու օր առաջ Կառավարության շենքում հանդիպեցին Նիկոլ Փաշինյանի հետ և նրա ձեռքը սեղմեցին։

«Ովքե՞ր էին այդ մարդիկ, 20 տարուց ավելի է՝ խոսում են Նավասարդ Կճոյանի վարքի մասին։ Մյուսը՝ սրբազան Քյարամյանն էր, որի մասին խոսում են, որ տղա ունի, իսկ Աբրահամ սրբազանի մասին խոսում են, որ մեծ գումարներ ունի, և այլն։ Այս ամենը խոսակցություններ են։ Այս ամենի մեջ աղետալին այն էր, որ հանդիպմանը գնացել էր Արցախի թեմի առաջնորդը, որովհետև Արցախի թեմը կաթողիկոսը չէր լուծարել, և Վեհափառի դեմ արշավի պատճառներից մեկն իշխանությունների կողմից հենց սա է եղել։

Հիշեցնեմ՝ մոտ 2 տարի առաջ Ադրբեջանի նախագահը փորձեց Շուշիի սուրբ Ղազանչեցոց եկեղեցին և մյուս եկեղեցիները վերագրել ռուս ուղղափառ եկեղեցուն, համարելով նաև աղվանական։

Հիմա ամեն կերպ ուզում են եկեղեցին հայերից հեռացնել ու բերել մի կաթողիկոսի, որն այս ամենը չի ճանաչի Առաքելական եկեղեցու մաս, կթողնի Ադրբեջանին ու կասի՝ արեք այն, ինչ ուզում եք»,- հավելեց Հուսիկ Արան։

Ըստ մեր զրուցակցի, տևական ժամանակ լուրեր են շրջանառվում, որ իշխանություններն այս մարդկանց վրա «կոմպրոմատներ» ունեն, բայց սա նրանց արարքը չի արդարացնում, նրանք պետք է վեր կանգնեին ամեն ինչից։

«Նիկոլը պղտորում ու մխտռում է ամեն բան, կեղտոտում է մեր հավատի տաճարը, որևէ արժեք չմնաց, որ այդ տղան չպղծի, չթողեց որևէ «կարմիր գիծ»։

Արդեն չեմ էլ կարող ժողովրդին մեղադրել, որովհետև մեզ առաջնորդ է պետք, իմ վերջին գրքում, որն այս պահին տպարանում է, այս մասին խոսել եմ։ Իրական առաջնորդներն են կերտում պատմություն, նրանք են իրենց ժողովրդին առաջնորդում։ Մենք, ես էլ՝ իրենց հետ, այս ամենի մասին չպետք է լռենք ու հանդուրժենք։

Անկախ ամեն ինչից, Նիկոլը եկեղեցին կքանդի՞, թե՞ կպարտվի, այս եպիսկոպոսները պատմության մեջ մնալու են՝ որպես եկեղեցին ներսից դավաճանածներ, նզովյալներ։ Այս մարդիկ հստակ գիտակցում են, որ Նիկոլը դուրս է եկել եկեղեցու դեմ, իրենք էլ նիզակն առել ու միացել են Նիկոլին։ Անկախ նրանից, ինչ կոմպրոմատներ կան այս անձանց դեմ, նրանք չպետք է ընկրկեին, ասեին՝ ինչ ունեք, հրապարակեք, մարդը սխալական է, այդպես ավելի հարգանքի արժանի կլինեին, այդպես իրենց բուն հավատքին ու դավանանքին չէին դավաճանի»,- շեշտեց նա։

Հուսիկ Արայի կարծիքով՝ Վեհափառ հայրապետը պետք է անսասան պահի իր գահը, այս խարդավանքներից հեռու պահի Առաքելական եկեղեցին։

«Կաթողիկոսը պինդ ու ամուր պետք է մնա իր դիրքերում, շարունակի կատարել իր առաքելությունը, նրա թիկունքին է ողջ հավատավոր ժողովուրդը։ Կաթողիկոսը չպետք է հեռանա, նրան հոգևոր ժողովն է ընտրել, օծյալ կաթողիկոս է։ Եկել է մեկը, որն ասում է՝ «դու կարգալույծ ես», ո՞վ ես դու, Նիկոլ, ի՞նչ ես ուզում, ինչո՞ւ ես խառնվում ու քրքրում։ Սա թուրքի հրահանգն է, որովհետև այնպիսի կաթողիկոս է ուզում, որ ընդունի այն ամենը, ինչ անում է, հատկապես՝ Արցախի հարցում»,- ընդգծեց Հուսիկ Արան։