Թուրք պատգամավորը նշում է Թուրքիայի Հանրապետության օրը Հայաստանի խորհրդարանում
Տարածաշրջանային երկխոսությունն ու համագործակցությունը ներկա լարված ժամանակաշրջանում շատ կարևոր է։ Այս մասին Հայաստանի Հանրապետության Ազգային ժողովում ընթացող Եվրանեսթ խորհրդարանական վեհաժողովի լիագումար նիստի ընթացքում հայտարարել է Թուրքիայի խորհրդարանի պատգամավոր Իսմայիլ Էմրահ Քարայելը՝ անդրադառնալով Թուրքիա-Եվրամիություն հարաբերություններին և Թուրքիայի ԵՄ անդամակցության հեռանկարներին։
Թուրք պատգամավորը նաև իր խոսքում հիշեցրեց, որ այսօր՝ հոկտեմբերի 29-ին, իր երկրում նշվում է Թուրքիայի Հանրապետության օրը։
«Ինչպես գիտեք՝ այսօր Թուրքիայի Հանրապետության հիմնադրման 102-րդ տարին է։ Հավատացած ենք, որ այսպիսի ուրախ օրը այստեղ՝ Երևանում գտնվելով և խոսելով Եվրանեսթի հարթակից՝ էական կարևորություն ունի այս ժամանակահատվածում, երբ տարածաշրջանային հակամարտությունները լարվում ու սրվում են, տարածաշրջանային երկխոսությունն ու համագործակցությունը Եվրամիության (ԵՄ) և թեկնածու երկրների հետ շատ կարևոր է, և ընկալում ենք և հասկանում, քանի որ մենք միշտ բոլոր հարթակներով շեշտել ենք Թուրքիայի անդամակցումը ԵՄ-ին՝ որպես ռազմավարական առաջնահերթություն։ Ակնկալում ենք, որ Եվրամիությունն էլ իր հնարավոր կամքը և տեսլականը կներկայացնի Թուրքիա-ԵՄ հարաբերությունների խորացման կոնկրետ քայլերով», – նշեց թուրք պատգամավորը։
Ավելի վաղ հայտնի էր դարձել, որ Եվրանեսթի անդամ չհանդիսացող Թուրքիայի խորհրդարանի պատգամավորները՝ Իսմայիլ Էմրահ Քարայելը և Բուրհան Քայաթուրքը, Երևանում հանդիպում էին ունեցել Ազգային ժողովի արտաքին հարաբերությունների մշտական հանձնաժողովի նախագահ Սարգիս Խանդանյանի հետ։
ԱՐԱՄ ՍԱՐԳՍՅԱՆ
