Հայաստանը ոչ թե թուրք-ադրբեջանական միջանցք է տալու, այլ ինքն է դառնալու թուրք-ադրբեջանական միջանցք. Էդուարդ Շարմազանով
ՀՀԿ Գործադիր մարմնի անդամ Էդուարդ Շարմազանովը գրել է․
«Նիկոլը հրաժարվել է Հայաստանի Հանրապետությունը գործոն դարձնելու բոլոր առավելություններից ու Հայաստանը վեր է ածում թուրք-ադրբեջանական միջանցքի։
Վերջին մի քանի տասնամյակում Հայաստանի տարածաշրջանային ու որոշ չափով նաև աշխարհաքաղաքական լուրջ գործոն լինելը պայմանավորված է եղել մի քանի հանգամանքով.
– Հայկական Արցախի գոյությամբ
– Հայկական Սյունիքի, հայ-իրանական սահմանի ու Ադրբեջանը Նախիջևանից կտրված պահելու տարածքի առկայությամբ
– Հայկական ատոմակայանով
– Հայաստանում ռուսական 102-րդ ռազմաբազայի առկայությամբ։
Նիկոլն ու նրա թուրք-ադրբեջանական գործընկերները չեզոքացրել են հայկական Արցախը, Սյունիքին լուրջ վտանգ է սպառնում, ատոմակայանը հայ-ռուսական դեգրադացվող հարաբերությունների հետևանքով կարող է կանգնել փակման վտանգի տակ, իսկ ռուսական ռազմաբազան էլ տեսանելի ապագայում կարծես դուրս է հանվելու՝ նիկոլական ռեժիմի առկայության դեպքում։
Այս սցենարի խաղարկման արդյունքում Հայաստանը ոչ թե թուրք-ադրբեջանական միջանցք է տալու, այլ ինքն է փաստացի դառնալու թուրք-ադրբեջանական միջանցք»։
