ԵՄ հանձնակատարը ժամանել է ԱՄՆ՝ Ռուսաստանի դեմ պատժամիջոցների նախապատրաստման համար
Պատժամիջոցների հարցերով ԵՄ հատուկ բանագնաց Դեյվիդ Օ’Սալիվանի գլխավորությամբ ԵՄ պատվիրակությունը ժամանել է ԱՄՆ՝ հակառուսական պատժամիջոցների համաձայնեցման համար:
Այդ մասին Բրյուսելում կայացած ճեպազրույցի ժամանակ հայտարարել է Եվրոպական հանձնաժողովի ներկայացուցիչ Օլոֆ Ջիլը:
Պաշտոնյան ընդգծել է, որ հակառուսական պատժամիջոցների վերաբերյալ ամերիկյան կողմի հետ խորհրդակցությունները տեղի կունենան «սեպտեմբերի 8-ին՝ օրվա երկրորդ կեսին»:
Նա հրաժարվել է մեկնաբանել ԱՄՆ նախագահ Դոնալդ Թրամփի պահանջները, որ ԵՄ-ն ամբողջությամբ հրաժարվի ցանկացած ձևով ռուսական նավթամթերքի, ինչպես նաև ռուսական գազի գնումներից: Նա նաև հրաժարվել է մեկնաբանել ԱՄՆ նախագահի խոսքը Եվրամիության դեմ պատասխան միջոցների հնարավոր սահմանման մասին՝ ի պատասխան սեպտեմբերի 5-ին Եվրոպական հանձնաժողովի կողմից Google ընկերությանը 3 միլիարդ եվրոյով տուգանելու որոշման՝ ԵՄ մրցակցային կանոնները խախտելու համար:
Սեպտեմբերի 8-ին Եվրոպական խորհրդի ղեկավար Անտոնիու Կոշտան հայտնել է, որ Եվրոպական հանձնաժողովը պատժամիջոցների 19-րդ փաթեթի շրջանակներում պատրաստում է երկրորդային պատժամիջոցներ Ռուսաստանի գործընկեր պետությունների դեմ, որոնք գնում են ռուսական էներգետիկ ռեսուրսներ: Նա չի հստակեցրել, թե Բրյուսելը երբ կավարտի 19-րդ փաթեթի համաձայնեցումը:
